Jwma, 11 qırküyekte Qazaqstanda 68 adamnan koronavirus, 307 adamnan pnevmoniya anıqtalğan. Qırküyek ayınıñ alğaşqı onkündiginde koronavirus pen onıñ pnevmoniyalıq türin qosa eseptegende 4 368 auru jağdayı, 95 ölim oqiğası tirkeldi.

DenMin dereginşe, auru jağdayınıñ eñ köbi tört kün qatarınan Şığıs Qazaqstan oblısında 18 adamnan tabılğan. Apta basınan beri 86-ğa östi. Öñirdegi jağday basqa aymaqtarğa qarağanda örşip twr.

Qazirgi tañda elde 4 550 adam emdelip jatır. Onıñ 2 431-i stacionarda, 2 119-ı ambulatoriyada.
Jağdayı qiın 130 nauqastıñ 20-sınıñ ahualı qattı naşarlağan. Sonday-aq, 26 adam ökpeni jasandı jeldetu apparatımen tınıstap jatır.​

Sonımen qosa, jwma küni koronavirus pnevmoniyasına şaldıqqan 307 adam tirkelipti. Biraq olardıñ qanşası qay aymaqtan ekeni belgisiz. PTR testi teris şıqqanımen, koronavirus saldarınan asqınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözinde twrğan joq. Äli künge deyin koronavirus pnevmoniyasınıñ öñirlerdegi dinamikasın bile almay kelemiz.

Elde koronavirus jwqqanı PTR-testimen rastalğandar 107 mıñğa juıqtasa, aqökpege asqınğanı 29 mıñnan astı. DDSW mälimetinşe, Qazaqstanda auırğandardıñ sanı 135 mıñnan asqan. Degenmen Ükimet koronavirus pen onıñ pnevmoniyasın eki bölek eseptep keledi.

Pandemiya bastalğalı jalpı jiını virus jwqqandardıñ 2,5 mıñnan artığı (KVI+ / U07.1 – 1661, KVI- / U07.2 – 320, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"