«Qıstıñ qamın jazda oyla» – Europa Odağı indettiñ ekinşi tolqını jaña qorqınış tudıruı mümkin dep kütilgen aldağı qıs mezgiline dayındıq körip jatır. Europanıñ tizgin wstauşıları «Karantinsiz qıs» josparın dayındauda. YAğni, jazdağı karantin şaralarınsız, indetpen qatar qıtımır qıstan şığudıñ özge joldarın tappaq.

Karantin şaraları indettiñ jayıluın azaytatın önimdi şaralardıñ biri bolğanımen, qoğamğa jäne ekonomikağa auırlıqtar alıp keldi. Sondıqtan da, ekonomikalıq ösimdi qattı qadağalap otıratın Europa elderiniñ liderleri tolıqtay oqşaulau şarasın qabıldamay-aq, virustıñ taraluın şekteytin jaña täsilderdi tabudıñ mañızdılığın basa aytıp otır.

Ne degenmen, älem halqı viruspen qatar ömir süruge üyrene bastadı dese de boladı. Betperde kiyu, äleumettik aralıqtı saqtau, jeke jäne äleumettik ornatıñ tazalığına köñil bölu, mümkindiginşe onlayn jwmıs isteuge ötu sekildi. Biraq, sonıñ işinde europalıqtardıñ jaña sınaqqa tağı da erterek beymdelgenin körip otırmız. Virustıñ taraluın şekteytin qarapayım täsilderdi jalpılastıruda da Europa elderi öziniñ ülgisin körsetti. Eñ qızu qandı europalıq sanalatın ispandar men italiyalıqtar da jaña salttarğa köndige bastağanday. Eñ bastısı medicinası auır sınaqtan jauır bolsa da ötip şıqtı. Sondıqtan, endi Europa elderi indettiñ ekinşi tolqınınan şvedterdiñ jolımen jürip ötemiz desip otır.

İndettiñ alğaşqı tolqını kelip soqqanda Europa Odağına müşe 27 el bir-birimen şekarasın jauıp, tas-tüyin bekingen edi. Nätijesinde bwdan EO ekonomikası auır soqqı alıp, bir ğana jazda 1 trln evro joğalttı. 8 payızğa tömendegen ösimmen älemdegi ekonomikalıq qwldırau jağınan Amerikadan keyingi ekinşi orınğa jayğastı. Europadağı qızmet öteu käsibi 16,4 payızğa qısqarıp, turizm bolsa 75 payızğa deyin toqırauğa wşırağan.

Osıdan keyin Europa ekinşi tolqın indetke karantinsiz dayındaluğa şeşim qabıldap otır. Ol üşin Europanıñ tağdırı jekelegen europalıqtardıñ qolında bolmaq. Aytalıq, jeke adamdardıñ qauipsizdik erejelerin orındauı twtas qoğamnıñ qauipsizdigine tikeley äser etpek. Sol arqılı ekonomikalıq qwldıraudıñ aldın aluğa tırısıp bağuda.

"The Qazaq Times"