Qazaqstannıñ ekinşi prezidenti Toqaevtıñ baspasöz hatşısı Berik Uäli. Foto: aşıq derekköz

Qazaqstannıñ qazirgi prezidenti Toqaevtıñ baspasöz hatşısı Berik Uäli öziniñ koronavirus jwqtırğanın habarladı.

Ol Facebook jelisindegi jeke paraqşasında 5 mausımda tapsırğan testinen virus tabılğanın, auruhanada emdelip jatqanın jazdı. Jazba soñına jeli qoldanuşıları 1,5 mıñday pikir qaldırıp, 200-ge juıq märte bölisken. Köbine «sauığıp ketuine» tilek bildirgen.

«Qazir auruhanada, därigerlerdiñ qarauında jatırmın. Jağdayım bir qalıptı. Asa alañdaytınday emes» dep jazdı.

Sonday-aq hatşı Uäli bastığı Toqaevtıñ densaulığı jöninde de söz etken.

«Basın aşıp aytatın mäsele, Prezident belgilengen kestege säykes jwmıs istep jatır. Memleket basşısınıñ densaulığına eşqanday qauip tönip twrğan joq. Qasım-Jomart Kemelwlı ünemi test tapsırıp, qorıtındısın alıp otır», – degen şeneunik Aqordada sanitarlıq rejim küşeytilip, qauipsizdik şaraları qataytılğanın da habarladı.

43 jastağı Berik Uäli 2019 jıldıñ naurızınan beri äueli tağayındalıp, keyinnen saylanğan Toqaevtıñ baspasöz hatşısı äri bilik partiyası Nwr Otannıñ «eñ jüzi jılı» müşesi.

– Osı indet bastalğalı barlığımız dabıl qağıp, saqtanuğa, dertti jwqtırmaudıñ joldarın qarastıruğa şaqırıp kelemiz. Biraq pandemiyağa senbeytin, aurudı joq deuşiler azaymay twr. Ondayda «Auırğan adamdı körsetiñderşi», «Meniñ tanısımnıñ birde-biri auırğan joq. Sonda onımen kim auırıp jatır?», «Auırğan adamdardıñ attarın nege atamaydı?» degen siyaqtı pikirlerdi jii estitinbiz. Mine, men dert jwqtırdım, onı jasırmay jariyalap otırmın. Mwndağı maqsat alañsız jürgen azamattar oylansın, senbey jürgen kisilerdiñ közi jetsin degenim. Auru bar. Onı jwqtıruşılardıñ sanı kün sayın artıp jatır. Qanşa jerden saqtıq şaraların qatañ saqtap jürsek te, biz de jwqtırdıq. Endi emdelu kerek, – deydi Uäli senbeytinderdiñ közin jetkizgisi kelip.

Bwğan deyin älemniñ damığan, örkenietti elderinde birinşi basşılar men joğarı lauazımdağı şeneunikterdiñ koronavirus jwqtırğanı habarlanğan. Qazaqstannıñ densaulıq saqtau ministrligi men bas memlekettik sanitardıñ karantin kezinde media jäne BAQ qızmetin şekteu şeşiminen soñ, elde aqparat jetispeuşiligi tuıp, onıñ ornın kümän men jalğan mälimet toltırıp, virustıñ barına senbeytinder köbeygen.

"The Qazaq Times"