Almatı qalasınıñ koronavirus jwqtırıp, qaytıs bolğan twrğındarın jerleuge arnalğan oblıstağı Qaraoy ziratı. Biraq Almatı olbısında eşqanday ölim tirkelmegen. Foto: Azattıq

Keşe, 3 mausım küni Qarağandı oblısınıñ 56 jastağı, Atırau öñiriniñ 56 jäne 69 jastağı twrğındarı, sonımen qosa 69 jastağı qaytıs bolğanı habarlandı. Jazdıñ alğaşqı 3 küninde derttiñ tura äserinen 8 qazaqstandıq virustıñ kesirinen qaza boldı.

Soñğı jıldarı sanitarlıq-epidemiologiyalıq sala qwrdımğa ketip baradı dep sanaytın medicina sarapşısı Qayırğali Köneev joğarı instanciyadağı jağdayğa öz pikirin bilirdi.

«Sanitar därigerlerdiñ özi ne isterin bilmeydi. Mwnı bas memlekettik sanitar şığarğan qaulınıñ eki jarım ayda 7 märte özgeruinen köruge boladı. Tipti bir qaulı ekinşisine qayşı keledi. Mäselen,7 qaulı besinşisin teristeydi. Bwl Qazaqstannıñ sanepidemiologiyası «panikada» ekenin añğartadı. Eñ bastı mäseleniñ biri – atalğan salada öz isin jetik biletin mamannıñ bolmauı. Käsibi kadrlardıñ köbi kezinde eñbek jağdayınıñ naşarlığınan täuelsiz sanitarlıq audit, jeke biznes salasına ketip qalğan. Köz aldımızda bolıp jatqan kemşilikter men şikilikterdiñ bäri memlekettik basqarudağı SES salasın densaulıq saqtau ministrliginen bölu kerektigin körsetedi», – deydi.

Mamannıñ sözine qarağanda, Qazaqstanda tirkelgen keysterge şaqqanda ölim körsetkişi äldeqayda tömen. Tipti tura proporciodan aytarlıqtay az. Medicina ğılımdarınıñ kandidatı Köneev «Bizdiñ jağdaydağı ölim körsetkişiniñ azdığı – biliktiñ arqasında emes, halıqtıñ jasına baylanıstı tabiği jağday. Qazaqstan halqınıñ ortaşa jasına qatıstı. Erlerdiñ orta jası – 30, äyelderdiki 33 jas. Demek negizgi kontingent  jas bolğandıqtan, virusqa qarsı eldiñ imundıq jüyesi de qauqarlı», – dep naqtıladı.

Sonımen qosa sarapşı koronavirus keysteriniñ şınayı esebin eşkim, tipti ministr de bilmeui mümkin deydi. Onıñ sözinşe, qazirgi cifr şındıqtan alşaq boluı ıqtimal. «Osı uaqıt aralığında ministrliktiñ «cifrlıq körsetkişterdi oynatuına» kuä boldıq» deydi täuelsiz  däriger.

Eki jarım aydıñ işinde COVID-19 jwqtırğandar sanı 12 mıñnan asıp ketti. Naqtıraq aytqanda, nauqastar sanınıñ jalpı  jiını 12 067-ge jetti. Onıñ jartısınan köbi (6240) auruınan ayığıp üyine jiberilgen. Ökinişke qaray, resmi aqparat boyınşa, COVID-19 virusın jwqtırğan 48 adamnıñ jağdayı qiındap, qaytıs bolğan. Degenmen birqatar BAQ ökilderi (Informbyuro jäne Azattıq) ötken aptada Qazaqstanda virus jwqtırğan kem degende 72 adamnıñ qaytıs bolğanın anıqtap habarlağan edi.

"The Qazaq Times"