AQŞ-ta afroamerikalıq azamattıñ qazasınan keyin bastalğan qaqtığıstar äli basılğan joq. Koronavirus dendegen memleket üşin bwl jağday «jığılğanğa jwdırıq» bolğanday. Eldegi hal-ahualdı jiti baqılap otırğan Aq üy basşısı Donal'd Tramp jağdaydı retteu üşin bülik orın alğan qalalarğa äsker jiberetinin ayttı. Bwl jaylı SkyNews jazdı.

Keşe şeruge şıqqandar Aq üy aldına jinalıp, bülik şığarğan. Sondıqtan da prezident pen onıñ äyeli bunkerge jasırındı. Keyinnen prezident eldegi jağday jayında mälimdeme jasadı. Tramp mälimdemesinde: «Meniñ äkimşiligim zorlıq-zombılıqtı toqtatadı. Amerikağa qwldırau emes, örleu qajet. Qastıq emes, dostıq kerek. Büliktiñ ornına tärtip ornauı kerek», – dedi. Sonımen qatar bwl ereuilderdi wyımdastırğan «Antifa» qozğalısın terrorlıq top tizimine engizetinin ayttı. Aldağı uaqıtta bülikti basu maqsatında aymaqtarğa äskerler jiberilmek. Biraq Tramptıñ saylaudağı qarsılası Djo Bayden «qalalarğa äsker jiberu – Amerika halqına qarsı şığu» deydi.

Uaşington meri Myuriel Bauzer: «Alğaşında ereuilder beybit türde ötken. Alayda artınşa tärtipsizdikter beleñ aldı. Köbi bwğan aldın ala dayındalıp kelgenge wqsaydı. Mäselen, dükenderdiñ tereze-esigin sındıru üşin arnayı qwraldar alıp kelgen. Sondıqtan bülikke wyımdasqan toptardıñ qatısı bar ma degen oy keledi», – deydi. Köptegen sarapşılar Amerikada beybit türde bastalğan şerulerdiñ iri qaqtığıstarğa wlasuına sırtqı küşterdiñ, tipti Reseydiñ ıqpalı bar dep sanaydı.

25 mamırda Minneapolis qalasında 46 jastağı Djordj Floyd policey ökilderiniñ köz aldında jan tapsırğan. Düken kassiri marqwm jalğan banknotpen esep ayırıspaq boldı degen uäjben policiya şaqıradı. Artınşa oqiğa ornına kelgen tärtip saqşıları küdiktiniñ qolına kisen salğannan keyin oficerlerdiñ biri onıñ jelkesinen ayağımen 7 minuttay basıp twrğan. Dauısı qarlıqqan afroamerikalıq öziniñ dem ala almay jatqanın aytadı, biraq oğan policeyler qwlaq aspağan. Osıdan keyin «Men twnşığıp qaldım!» tirkesi şerudiñ bastı wranına aynaldı.

"The Qazaq Times"