Özbekstanda 11 däriger koronavirus jwqtırğan. Al Qazaqstanda tirkelgen nauqastardıñ arasında şetelden kelgender men baylanısta bolğandar da bar. 

Qazaqstannıñ aqparat ministri Däuren Abaev 26 naurız keşkisin koronavirus jwqtırğan bir nauqastıñ köz jwmğanın habarladı. Abaevtıñ sözinşe, qaytıs bolğan äyel adam astanada emdelip jatqan. Degenmen äleumettik jelide ärtürli mälimet taradı. 64 jasında COVID-19 infekciyasınan qaytıs bolğan marqwm äyeldiñ üyde bolğanın, soñğı birneşe täulikte üş märte jedel järdem şaqırğanı jöninde derek bar.

Densaulıq saqtau ministrligi taratqan habarlamada Aqmola oblısınıñ 64 jastağı twrğınınıñ «ölim sebebi – eki jaqtı pnevmoniya, dem jetispeuşiligi, sepsis, qant diabeti, gipertoniyalıq aurular men ateroskleroz. Al pnevmoniya sebebi – koronavirus» delingen.

Sonday-aq eldegi alğaşqı qazağa baylanıstı prezident Toqaev Twitter jelisindegi resmi parağına öz pikirin jazdı.

«64 jastağı äyeldiñ koronavirustan qaytıs boluı bwl indettiñ asa qauipti äri karantindi saqtau öte mañızdı ekenin körsetedi. Tuğan-tuıstarına köñil aytamın. Elorda men Almatıda karantin şaraların küşeytip, Şımkentte şekteuler engizu jöninde şeşim qabıldandı», – dep jazdı ol.

27 naurız marqwmnıñ naurız toyı kezinde Almatı qalası men Şu öñirine poezben qonaqqa barıp qaytqanı belgili boldı. Qazirgi tañda Qazaqstannıñ on öñirinen 124 nauqas tirkelgen, ekeui auruınan ayığıp şıqsa, bireui köz jwmdı. Dertke şaldıqqandardıñ jartısına juığı astanadan, elu şaqtısı Almatı qalasınan, Qarağandıda tört, Atırau jäne Jambıl oblıstarında üşeuden, Şımkentte eki, SQO, Aqmola jäne Almatı oblıstarında bir nauqastan tirkeldi.

Qazaqstannan bir apta keyin qauipsizdik şarasın qolğa alıp, karantinge qamdanğan Özbekstanda da jwma küni tañda alğaşqı ölim jağdayı anıqtaldı. Eldiñ sanitar inspektorı Nurmat Atabekov «Namangan aymağınıñ 72 jastağı twrğını bwğan deyin qant diabeti jäne jürek qantamırınıñ jetispeuimen auırğanın» habarladı.

COVID-19 koronavirusın jwqtırğan 83 özbekstandıqtıñ 11-i däriger ekeni belgili boldı. Taşkent biligi qızmet barısında dertke şaldıqqan är därigerge memleket tarapınan 10 mıñ dollar köleminde järdemaqı beriletinin mälimdedi.

Bügindikke tañnan beri Qazaqstanda 11, Özbekstanda 8 jağday tirkelip ülgerdi.

"The Qazaq Times"