Erte köktemniñ eleuli küni, älem-jarıqtıñ swlulığın äspetteytin 8 naurız – halıqaralıq äyelder men arular merekesi. Jazğıtwrımnıñ ä degennen alğaşqı jılı lebi seziletin ataulı mereke eldiñ köñilin ıstıq lebizge toltırıp, şat äser sıylaydı. Tirşiliktiñ tüleuine jaqın bwl mezgilde barlıq näzik jandınıñ şalqığan köñili köktemniñ habarşısı sekildi är jürekke jılu wyalatadı. Biri anasına, endi biri äjesine, jarı ne äpke-qarındasına, wstazına arnayılap qwşaq-qwşaq gül köterip jürgen köpşiliktiñ janarınan mahabbat pen iltipat esetin kün.
Halıq auzında «Düniede üş nwr bar. Birinşisi – künniñ nwrı, ekinşisi – aqıldıñ nwrı, al üşinşisi – ananıñ nwrı» degen wlağattı söz bar. Bwl – qadım zamandardan tirşilik ataulınıñ anadan taraytındığın meñzeytin asıl wğım ispetti.
Elimizdiñ damuına ölşeusiz eñbek siñirgen ärqanday äyeldiñ ömir jolı – twnğan şejire. Qoğamnıñ barlıq salasında ayanbay eñbek ete jürip, jaqındarına jılu sıylay biletin äyelder qauımı qanday qwrmetke de layıq.
Qazaq tarihında esimderi altın äriptermen örnektelgen Twmar hanım, Wmay ana, Ayşa bibi, Domalaq ana, qolbasşı Bopay hanım sekildi twtas wlttı tärbielep, halıqtı qalıptastırıp, memleketimizdi bayandı etuge mol üles qosqan analarımızdıñ igilikti isin büginde ziyalı, el bolaşağına beyjay qaray almaytın azamattıq-qoğamdıq belsendiler qatarındağı qız-kelinşekter jalğastıruda.
Osı orayda “The Qazaq Times” wjımı atınan, Qazaqstandağı jäne älemdegi barlıq äyelder qauımın bügingi merekemen şın jürekten qwttıqtaymız! Asıl analarımızdıñ, ayaulı äpke-qarındastarımızdıñ ömirleriniñ şuaqtı nwrğa toluın, är küniniñ merekedey mereyli boluın tileymiz! Jer jwrtşılığınıñ barşa äyel zatına zor densaulıq, otbasına amandıq, bayandı baqıt, eñbekte tabıs tiley otıra, saytımızdıñ oqırmanı bolğan qazaqtıñ qaraközderin, asıl aruların jäne aq jürekti barşa oqırmanımen birge wjımda qızmet etken qızdarımızdıñ da merekesine qwttı bolsın aytamız!

“The Qazaq Times”