Almatı qalasında policiya "Respublika" jäne "Astana" alañdarınıñ mañın qorşap twr. Atalğan aumaqtarda wyalı baylanıs operatorlarınıñ internet qızmeti de bwğattalğan. 

Bwdan bwrın elimizdegi birqatar qoğamdıq wyımdar men qozğalıstar, jaña partiyalar narazılıq şarasın ötkizetinin bildirgen. Olardıñ qatarında Qazaqstanda ekstremistik wyım retinde şektelgen "Qazaqstan Demokratiyalıq Tañdauı" qozğalısı jäne äli tirkelip ülgirmegen "Dempartiya" da bar. Sonday-aq, narazılıq şarasına "Respublika", "Oyan Qazaqstan" qozğalıstarı da qoldau körsetken.

Osığan baylanıstı Almatı qalasında policiya alañdardı jäne soğan jaqın aumaqtı qorşauğa aldı. Jayau jürginşilerdiñ ötuine de tıyım saldı. Wyalı baylanıs jelisiniñ bwğattaluına baylanıstı Kcell  jäne Beeline baylanıs operatorlarına habarlasıp swrağanımızda, el ortalığı men Almatı qalalarında qwzırlı organdar tarabınan wyalı baylanıs jelisiniñ bwğattalğanın ayttı.

Tilşilerimizdiñ habarına qarağanda, policiya alañğa jaqın mañda barlıq jürginşilerdiñ ötuine şekteu qoyğan. Jurnalisterdi de birneşe ret qatañ tekseruden ötkizgen. Arasında qızmettik tapsırması joq degen ayıppen Anar Aqqozını wstamaq bolğanı jäne Äsel Jañabay esimdi jurnalisti wstağanı mälim boldı. Sonday-aq, tilşilerimizden belgili jurnalist, "Dat" jobasınıñ jetekşisi Ermwrat Bapi da policiya tarabınan wstalğanı turalı mälimet kelip tüsti.

Äriptesterimiz, Ermwrat Bapidıñ wstalğanı turalı oqiğa ornında baqılap twrğan Almatı Policiya departamentiniñ baspasöz qızmetiniñ ökilderinen swrastırğan. Biraq, olar bwl turalı "bilmeytinin" aytqan. Jurnalister sol mañda Ermwrat Bapidıñ "105752" nomerindegi policiya arnayı köligine otırğızılğanın anıqtağanımen, policiya qızmetkerleri bwl mälimette joqqa şığarğan jäne jurnalisterdiñ arnayı kölikti tüsiruine qarsı bolğan.

“The Qazaq Times”