Qoğam belsendisi Dulat Ağadildiñ astanadağı tergeu izolyatorında qaytıs boluına baylanıstı Täuelsizdik dañğılındağı işki ister ministrliginiñ aldına jinalğan eluge juıq belsendini jasaq saqşıları küştep tört birdey avtobusqa tiep äketti.

Olar Dulat Ağadildiñ qazası jaylı tolıq aqparat berudi talap etken bolatın. Azattıq oqiğa ornınan tikeley efir jürgizdi. Belsendiler «beyjay, nemqwraylılıqtıñ kesirinen» bolğan oqiğanıñ bastı sebepkeri Erlan Twrğımbaev dep sanaytının jäne bas policeydiñ otstavkasın talap etti.

Jinalğandar aldına bastapqıda astanalıq policiya departamentiniñ bastığı Nwrjan Sädenov şığıp, Dulat Ağadildiñ qazası jaylı qısqaşa aqparat bergen. Ol osığan deyin taralğan resmi aqparattı rastap, «tergeu izolyatorında Dulat Ağadil janında tört adam otırğanın, olardıñ Dulat Ağadilge küş körsetilmegenine kuälik bergenin, jürek talmasınan qaytıs bolğanın» aytqan.

Tüsten keyin sağat 14:10 şamasında  policiya kelip, jiındı küşpen taratuğa kiristi. Baqıtjan Malıbaev bastağan tört avtobusqa jappay zorlıqpen salıp alıp ketti. Arasında tört policey jükti äyeldi de küştegenin bayqauğa boladı.

Tört avtobustan tüsken sarbazdar Täuelsizdik dañğılığın japqan belsendilerdi wstap jatır. Foto: Vlast

Belsendiler Dulat Ağadildi «ädiletsizdikke, Qazaqstandağı qazirgi sayasi rejimge qarsı şığıp jürgen adam» dep sipattadı jäne «onıñ 2019 jılı köp balalı äyelder jiınına barıp kömekteskenin» eske alğan bolatın. Belsendilerdi äketkennen keyin işki ister ministrliginiñ aldında bir top köp balalı äyelder qaldı. Olardı policiya baqılap twr.

Astana mañındağı eldi mekende twratın belsendi, altı balası bar Dulat Ağadildiñ tergeu izolyatorında qaytıs bolğanı turalı aqparat bügin şıqqan.

Qalalıq policiya departamenti «Tergeu izolyatorınıñ kamerasında onan özge tört adam boldı, olar Dulat Ağadilge küş qoldanılmağanı jaylı kuälik berdi. Medicinalıq kuälik onıñ qamauğa alınğan sätte alkogol'di işimdik işkenin, mas ekenin körsetti. Jedel järdem brigadası keldi. Qaytıs boluına «jürek talması sebep bolğan». Denesinde qanday da bir jaraqattar joq. Sotqa deyingi tergeu jwmıstarı bastaldı», – degen habar taratqan.

Bügin BWW jiınında adam qwqıqtarın saqtau-qorğau jaqsarıp keledi dep mälimdegen Qazaqstan astanasındağı wstau boldı. Foto: Vlast

Astana policiya departamenti bastığınıñ birinşi orınbasarı Baqıtjan Malıbaev aşınıp öksikke bulıqqan qariyanıñ «Nazarbaev öltirdi» degen uäjine «Siz elge bülik istemeñiz, Nazarbaev öltirgen joq, öytip aytpañız, onı saraptama anıqtaydı» dep, sabırğa şaqıruğa tırıstı. Ol öziniñ qızmetkerlerine swraq qoyıp, qarsı söz söylegen azamattardıñ atı-jönin anıqtauğa bwyrıq berdi.

Azattıq tilşisi Säniya Toykenniñ habarlauınşa, wstalğandarğa hattama toltırılıp, ayıppwl salınbaq. Biliktiñ deregine kümänmen qaraytın belsendiler «Dulat Ağadildiñ ölimin tekseretin arnayı komissiya qwrıp, oğan halıq ökilderi kiruin» talap etude.

Policiya departamenti baspasöz qızmetiniñ jazuınşa «biıl qañtar ayında Dulat Ağadilge ayıp tağılıp, «eşqayda ketpeu» turalı şara qoldanılğan. Tergeuge kelmegenine baylanıstı sot şeşimimen 24 aqpanda qamauğa alınğan».

Dulat Ağadil – äleumettik problemalar jäne azamattıq qwqıqtı saqtau mäselesin köterip jürgen belsendi. Biıl tamız ayınan beri birneşe äkimşilik jazağa tartılıp, kem degende 60 täulik qamauda otırğan.

Ol 2019 jıldıñ 16 jeltoqsanında rwqsat etilmegen akciyağa qatıstı dep ayıptalıp, 10 täulikke qamalğan edi. Qaraşanıñ ortasında äkimşilik qamauda otırğan Celinograd audandıq tergeu izolyatorınan qaşıp şığıp, ol äreketin «zañsız qudalauğa qarsılığım» dep tüsindirgen. Policiya eki kün boyı izdegen belsendi 15 qaraşada özi bas prokuratura aldına kelgen. Keyin ol «sot qaulısın orındamağanı üşin» tağı 6 täulikke sottalğan.

Europarlament deputattarınıñ Qazaqstanğa saparı qarsañında eldiñ  işki ister ministri Erlan Twrğımbaev 22 aqpandağı «zañsız mitingini» küşpen taratqanda 53 adam wstalıp, 10 adam äkimşilik jaza qoldanılğanın mälimdedi. Biraq bwl derektiñ qwqıq qorğauşılardıñ dereginen äldeqayda alşaq ekeni beseneden belgili. Bügin el astanasındağı Euroodaq ğimaratınıñ aldında ondağan adam narazılıq akciyasın wyımdastırdı. «Qazaqstanda demokratiya joq», «adam qwqıqtarı taptalıp keledi» degen narazı top Euroodaq ökildigi men Europanıñ birqatar memleketteri elşilikteriniñ nazarın audartqısı keletinin ayttı.

P.S.: Redakciya atınan artında şittey altı birdey perzenti qalğan Dulat Ağadilovtiñ otbası men jaqın-tuıstarına qayğırıp köñil aytamız.

"The Qazaq Times"