Mügedek arbasında otırğan Erik Jwmabaev arnayı jasaq ökilderine «şınayı zayırlı qoğam» boludıñ jolın tüsindirude. Almatı qalası. 22 aqpan 2020 jıl. Foto: QT

Bügin tüs kezinde, sağat 14:00-15:20 aralığında Almatı qalasınıñ ortalığındağı «Astana» alañınıñ aumağında elde tıyım salınğan «Qazaqstannıñ Demokratiyalıq tañdauı» beyresmi qozğalısınıñ sankciyalanbağan mitinginde kemi jüz şaqtı azamat wstaldı.

Bir aydan beri äleumettik jelilerde eks-bankir, quğındağı oppoziciyalıq sayasatker Mwhtar Äblyazov jetekşilik etetin, elde ekstremistik wyım retinde tanılıp,  qızmetine tıyım salınğan «Qazaqstannıñ demokratiyalıq tañdauı» qozğalısı internet arqılı azamattardı 22 aqpanğa jappay mitingige şaqırıp kelgen bolatın.

Jüzdegen jergilikti qwqıq qorğau organınıñ ökilderi baqılağan aumaqta internet bwğattalğan. Jiın kezinde käsiporındar men qoğamdıq tamaqtanu orındarı jabıq boldı. Äkimdik qızmetkerleri kezek-kezek Abılay han jäne bwrınğı Furmanov, sonday-aq Qazıbek bi-Töle bi köşeleriniñ aumağında jürgen azamattarğa tarauın swrap, eskertu jasadı. Tipti policeyler «jayau jürginşimin» degen ondağan adamnıñ uäjine qaramastan, küştep avtozakqa salıp äketti.

Äskeriler jas-kärisine qaramay, bärin top retinde jabıla jürip, keybirine küş körsetip wstadı. Bir omon aqsaqaldıñ qolın qımtap, eki qolımen qısıp köterip alıp ketti. Sonımen qosa Arbattıñ joğarı böliginde mügedek arabasına tañılğan Jwmabaev Erik aynalasına üymelegen qalıñ äskerilerge «diktaturalıq tiraniyanıñ zardabı», «bolaşaq üşin küresu» taqırıbında «däris oqığan» soñ, bir top jasaq arbasımen birge kötergen küyi jedel järdem köligine salıp äketti. Wstalğandardıñ keybiri «Qwrttağan bilik qwrısın!», «Mwhtar Jäkişevke bostandıq», «Kresloğa jabısıp qalğan eşkim joq, bilik bir ret bolsın auıssın da!», «Demokratiya», «Bostandıq» dep wrandap ayqayladı.

Tüske deyin däl osı mañda Dempartiyanıñ bastamaşıl tobınıñ jüz şaqtı jaqtastarı wstalğanı habarlanğan bolatın.

Bwl küni Şımkent, Taraz, Aqtöbe, astanada miting ötedi dep belgilengen jerge kelgen belsendilerdi policiya wstap jatır. Jer-jerde wstalğandar «Nazarbaev ketsin!», «Şal, ket!» dep wrandattı. Şımkenttegi Täuelsizdik sayabağında küzet küşeytilip, 20-dan astam adamdı policiya äketken. Tarazda da ortalıq köşelerde arnayı jasaq jwmıldırıldı. Aqtöbe men astanada policiya kem degende on adamdı äketti. Miting josparlanğan aymaqtarda ğalamtor jwmısı naşarlağan. Äzirge İİM wstalğandar turalı mälimdeme jasağan joq.

Äblyazovtiñ jwrtşılıqtı mitingige ündeuimen qatar jarısa profilaktikağa qamdanatın İİM qoğamda «basqaşa oylaytın» belsendilerdi ärtürli ayıptarmen üyde nemese izolyatorda qamauda wstaudı ädetke aynaldırğan.

                                   

*Fotomaterialdı köşirip jariyalauğa, basuğa, taratuğa rwqsat berilmeydi. 

"The Qazaq Times"