Sizdiñ densaulığıñız Sizge qanşalıqtı mañızdı? Öz densaulığıñızğa qanşalıqtı köñil bölesiz? Almatı aymaqtıq köpsalalı klinikanıñ mamandarı jurnalisterge arnap aşıq esik künin ötkizdi.

Türkitildes jurnalister qorınıñ wyımdastıruımen ötkizilgen jiınnıñ maqsatı – onkologiyalıq aurular mäselesine qoğamnıñ nazarın audaru, onıñ aldın alu jäne erte kezeñinde anıqtau, BAQ arqılı twrğındardı aqparattandıru men skriningtik tekserudiñ qajettiligin tüsindiru bolıp tabıladı. Baspasöz maslihatında alğaşqı bolıp söz söylegen atalmış klinika direktorı, Bas däriger Oljaev Sayahat Taurbekwlı skriningten ötudiñ mañızdılığın tüsindirip ğana qoymay, qaterli isikpen auratındar üşin halıq eminiñ qauipti ekenin atap ötti.

Mamandardıñ aytuınşa, Qazaqstanda rak auruınıñ taralu körsetkişi boyınşa birinşi orında süt bezi, ekinşi orında – ökpe obırı, üşinşi orında teri obırı, törtinşi orında asqazan obırı, toq işek jäne jatır moynı obırı tiisinşe 5-6 orında twr. Jalpı qaterli isik türleriniñ köbeyui jalğız bizdiñ elimizge ğana emes, bükilälemdik sipatqa ie. Al ginekologiyalıq qaterli isiktiñ eñ jii kezdesetin türleri: jatır moynı obırı, analıq bez obırı eken.
Onkologiyalıq aurulardıñ aldın alu maqsatında atqarılıp jatqan jwmıstarğa toqtalğan onkolog mamandar, twrğındardıñ öz densaulıqtarına nemqwraylı qaraytındıqtarın aytıp, dabıl qağuda. «Aurudı eñ bastapqı satısında anıqtau jaqsı nätije beredi. Bwl satıda emdeudiñ tiimdi joldarın qarastıruğa boladı. Nauqastıñ diagnozı neğwrlım bastapqı satısında anıqtalsa, onıñ qwlan-taza ayığıp ketu mümkindigi de soğan baylanıstı»,- deydi, Almatı aymaqtıq köpsalalı klinika direktorınıñ orınbasarı Şalbaeva Raş Şaripbayqızı.

Därigerler atı jaman auru jahandıq mäsele bolıp kele jatqandığın jäne oğan nazar audaru qajettigin eske saladı. Soğan oray, Almatı aymaqtıq köpsalalı klinikasında 25 qañtar Aşıq esik küni bolatının habarlaymız.

Meken-jayı: Almatı qalası, Demçenko köşesi, 83.

"The Qazaq Times"