Şıñjañ qazağı 30 jastağı Tilek Täbärikwlı elde qalatın boldı. 16 qañtar 2019 jıl. Foto: Azattıq / Nwrtay Lahan

Bügin, qañtardıñ 16-sı keşke qaray Almatı oblısı Jarkent qalasınıñ Panfilov audandıq sotında «şekaranı zañsız kesip ötti» degen ayıppen küdikke ilingen Şıñjañ qazağı Tilek Täbärikwlına sot ükim şığardı.

;feature=emb_title">Azattıqtıñ sot zalınan taratqan habarına qarağanda, Täbärikwlınıñ tuıstarı men belsendiler qatısqan sot procesin sud'ya Dinara Qwyqabaeva qaradı. Täbärikwlı 2018 jılı mamır ayında Qorğas sauda ortalığında oñtaylı twstı paydalanıp Qazaqstan-Qıtay şekarasın zañsız kesip ötken.

Sot otırısı barısında advokat Abdulla Baqbergen etnikalıq qazaqtıñ ıqtiyarhatınıñ köşirmesi men azamattıq aluğa jazğan ötinişi, tağı birneşe qwjattı is materialdarına qosudı swradı. Sud'ya ötinişti qanağattandırdı.

Prokuror Azamat Baysarov ayıptau aktisinde «şekaranı ädeyi kesip ötuiniñ maqsatı – Qazaqstan azamattığın alu bolğan, öytkeni bwrın onda Qazaqstannıñ ıqtiyarhatı bolğan» dedi. 2017 jılı jeltoqsanda Qıtayğa ötken kezde jergilikti mekeme qwjatın alıp, qaytarmay qoyğan. Osılayşa 2018 jılı köktemde 30 yuan' aqşağa rwqsat qağazın satıp alıp, Qorğas sauda aymağınan zañsız, eşbir tirkeusiz jasırın Qazaqstanğa ötip ketken. Sanalı türde täuekel etip tarihi otanına qaşqan ayıptaluşı öz qatesin moyındağan äri qanday jaza bolsa da Qıtayğa qaytarmauın swrap, onı elde öteuge dayın ekenin jetkizgen.

Deñgeyi «onşa auır emes qılmıs» bolğandıqtan, bwrın eşqaşan isti bolmağanın jäne öziniñ qatesin şın jürekten moyındauın, mwnday qadamğa otbasımen qosılu maqsatında barğanın eskere otırıp ükim kesti. Sud'ya Qılmıstıq kodekstiñ 392 babı boyınşa 6 ayğa bas bostandığınan ayırıp, jazasın qauipsizdigi barınşa tömen koloniyada öteu turalı ükim şığardı.

22 qazannan bastap tergeu izolyatorında bolğanın esepke alğanda, ol 5 ay 18 künin ötegen bolıp şığadı.Sonday-aq 30 jastağı Tilek Täbärikwlın jäbirlenuşiler qorına 10AEK (25 250 teñge) köleminde ayıppwl öteuge mindettedi.

2018 jılı tamızda etnikalıq qazaq Sayragül Sauıtbaydıñ sotı ötip, elde qalğanımen bosqın märtebesin ala almay, Şveciyağa qonıs audarğan bolatın.

Al bıltır 23 jeltoqsanda Jarkent sotı Qıtay quğın-qısımınan qaşıp kelgen Qayşa Aqandı altı ayğa şarttı jazağa kesken edi. Bwğan deyin  Şıñjañ qazaqtarı Qaster Mwsahanwlı men Mwrager Älimwlı küzde azşılıq wlttarğa jalının bürkigen ajdahadan bas sauğa izdep, şekara kesip ötken. Olardıñ sotı 6 qañtardı bastaldı.

“The Qazaq Times”