Keşe, jeltoqsannıñ 13-i Türkistan qalasınıñ M.Jwmabaev atındağı №15 mektep-gimnaziyasında jergilikti policey men mwğalim arasında kikiljiñ tuıp, mwğalimdi köpşiliktiñ közinşe arnayı naryadpen alıp ketken.

Atalğan oqiğa äleumettik jeli qoldanuşılarınıñ narazılığın tuğızıp, öñirdegi jauaptı mekemelerdi ayağınan tik twrğızdı.

Äleumettik jelide mektep direktorınıñ mindetin atqaruşı K.Äbdiqadırovanıñ qalalıq bilim böliminiñ basşısı A.Batırbekovağa jazğan "jağday barısı turalı mälimeti" taradı. Aşıq derekközderge süyensek, bilim ordasınıñ oquşılar äjethanası tüzde ornalasqan. Onda mwğalimderge arnayı keste boyınşa kezekşilik etu mindettelgen. Keşe kündiz sağat 10:25-ter şamasında Türkistan qalasınıñ işki ister böliminiñ bastığı, policiya podpolkovnigi Daniyar Meyirhan bastağan bir top policey mektep aulasında ornalasqan äjethananıñ kezekşiligin tekseruge kelgen. Sol kezde 30 jıldan astam eñbek ötili bar, joğarı sanattı dene şınıqtıru päniniñ mwğalimi Bahıt Kaukenov Manaswlı üziliste kezekşilikte bolıp, ayağınan su ötken soñ işke kirgen körinedi. Äjethana mañında kezekşilikte twrmauınıñ sebebin swrağan podpolkovnik Daniyar Meyirhanğa wstaz ayaq kiimin auıstıruğa kirgenin aytqan. Biraq policiya ökiliniñ "ädeptilikke jat" döreki swraqtarına mwğalim de tiisinşe jauap bergen desedi. Aqır ayağında Bahıt Manaswlınıñ jeke kuäligin tartıp alıp, äriptesteri men oquşılardıñ közinşe qolın qayırıp alıp ketken. Mektep wjımınıñ ara tüskenine qaramastan, küştep alıp ketip bara jatqan oqiğanıñ beynejazbaları internetke keñinen tarap ketti.

№15 mektep direktorınıñ bilim bölimine joldağan "mälimeti" äleumettik jelide taradı. Türkistan. 13 jeltoqsan 2019 jıl. Foto: Facebook

Mektep direktorınıñ äkimdikke joldağan mälimetine qarağanda, "kikiljiñ köşe boyında da jalğasqan, oğan jol boyındağı mektep oquşıları men özge wstazdar kuä bolğan". Sonday-aq işki "äjethana qasınan uaqıtşa ketken" wstaz işki ister bölimine jetkizilgen soñ hattama toltırıp, oğan 12 mıñ teñge köleminde ayıppwl salğan.

Äleumettik jelide az uaqıttıñ işinde ülken dauğa aynalğan oqiğağa qoğam belsendileri "äjethana kezekşiligin mwğalim moynına artıp qoyğan jauaptı twlğalar tömennen joğarığa deyin jauapqa tartıluı kerek" dep talap etip jatır. Jergilikti "Beket" gazetiniñ bas redaktorı Safuan Ötebaev öziniñ facebook paraqşasında "wstazdardı sabır saqtauğa şaqırıp, merekeden soñ şındıqqa köz jetkizetinin, aqparat taratatının aytıp" dürlikpeuge şaqırdı.

Äkim-qaralar jii bas swğatın oqu mekemesiniñ äjethana mäselesi äli künge deyin oñ şeşim tappay keledi. Aymaqta balalar därethanası ğimarat işinde ornalasqan oqu orındarı az.

Bügin erteñgilik Türkistan oblısınıñ bilim basqarmasınıñ ökili Rahımbek Jolaev  "policiya qızmetkerleriniñ rwqsatsız reyd jürgizgenin" jäne bwğan basqarma "jariyalı türde keşirim swraytının", jauaptılarğa "tiisti şara qoldanılatının" jetkizdi. Keşegi jağdaydan keyin täjiribeli wstaz Bahıt Manaswlınıñ qan qısımı köterilip jedel järdem kömegine jügingen. Jolaev mwğalimniñ "policiya qızmetkeriniñ zañsız äreketine prokuraturağa şağım tüsirgenin" habarlağan. Biraq "bedeline nwqsan" kelgen wstazdıñ tuıstarı men äriptesteri oblıstıq bilim basqaraması bastığınıñ sözimen kelispeydi. Olardıñ sözinşe, qan qısımı 200-den asıp, auruhanağa jatqızılğan  Bahıt Manaswlı eşqanday şağım jazbağan, oğan mwrşası da jetpey otır.

Bilim basqarmasınıñ bastığı Rahımbek Jolaydıñ jazbası. Türkistan. 13 jeltoqsan 2019 jıl. Foto: facebook parağınan skrinşot-qiındı

Bwğan deyin, 12 jeltoqsan Türkistan qalasınıñ policiya departamentiniñ bastığı Daniyar Meyirhan "mektepte jabıq twrğan äjethana bolğanımen, balalar dalağa jügiruge mäjbür" ekenin aytıp, eskertusiz reydke şığatının jazğan edi. Jazbasın "mektep inspektorlarınıñ jwmısın tekserudi şeştim" dep bastap, soñında jağdaydıñ bayıbına barmay jatıp qoğamdıq ortada qolın qayırıp äketuin bedeldi wstazdar "policiya öziniñ dörekiligin bilmey, özgeniñ minin jipke tizgiş" dep sınauda. Azamattıq qoğam belsendileri, sonıñ işinde belgili wstaz Meyirjan Temirbek "Tarazdağı siyaqtı äkim ornınan ketpes üşin mwğalim tualet küzetui kerek pe?" dep, öz köñil tolmauşılığın bildirdi. Azamattıq belsendi Aygül Orınbek "Erlan Twrğımbaev Türkistanda aşılmağan qılmıs köp, al policiya mwğalimderge qısım jasap jür!" dep sınadı. Mektep oquşıların zorlıq-zombılıqtan qorğau men qauipsizdik qızmetiniñ mwğalimderge jükteu - köpşiliktiñ tañdanısın, ızasın tudırıp otır.

Daniyar Meyirhannıñ jazbası. Türkistan. 13 jeltoqsan 2019 jıl. Foto: facebook parağınan skrinşot-qiındı

Qaraşanıñ ortasında Taraz mektepteriniñ birindegi aulada ornalasqan därethanada 7 sınıp oquşısına 38 jastağı er adam zorlıq körsetkeni qoğamda rezonans tudırğan bolatın. Sabaq kezinde swranıp şıqqan qız bala wşırasqan targediyalıq jağdayğa qatıstı prezident Toqaev mälimdeme jasap, jauaptı lauzımdı qızmetkerler men qala äkimi Qayrat Dosaevtı qızmetinen bosatqan edi. Sodan keyin el mektepteri baqılaudı "özinşe küşeytip", onı mektep inspektorları ne uçaskelik policeylerge emes, mwğalimderdiñ moynına artıp qoyğan.

Biıl Qazaqstan parlamenti «Pedagog märtebesi turalı» zañ jobasın qabıldap jatqan twsta küştik qwrılımdar men jergilikti basqaru organdarı mwğalimdi "qolbala" retinde sanap, äkimşilik qızmetterge jeguin tıymay keledi.

"The Qazaq Times"