Prezident Toqaev Wlttıq bankti qayta qwru turalı jarlıqqa qol qoydı. 2020 jıldıñ 1 qañtarınan bastap Qarjı narığın retteu jäne damıtu agenttigi tarap, qayta qwrılatın boladı.

Jaña memlekettik organ Almatı qalasında ornalasadı. Agenttik qarjılıq qızmetterdi twtınuşılardıñ qwqıqtarın qorğaydı, qarjılıq twraqtılıqtı qamtamasız etedi jäne qarjı narığın retteytin boladı. Wyım azamattıq-qwqıqtıq qatınastarğa öz atınan tüsedi.

Jarlıqta körsetilgendey, agenttik tikeley prezidentke esep beredi. Al agenttik törağası bwl qızmetke altı jılğa tağayındaladı.

Qwrılımı men ştat sanın tek prezident bekitedi. Jarlıq boyınşa jalpı ştat sanı 547 orınnan twradı.

Wlttıq bank törağasınıñ orınbasarı Oleg Smolyakov köktemde «qarjı sektorın retteu jönindegi täuelsiz organ qwru turalı zañ jobasın» tanıstırıp, parlament onı alğaşqı oqılımda-aq birauızdan maqwldağan. «Wlttıq bank pen Agenttiktiñ qızmeti tiyanaqtı türde, onıñ işinde basqaru organdarında özara ökildik etu arqılı üylestiriledi. Agenttik respublikalıq byudjet esebinen qarjılandırıladı. Eñbekaqı töleu jüyesin Qazaqstan Respublikasınıñ Ükimeti bekitedi, al qızmetşilerdiñ märtebesi Wlttıq bank qızmetşileriniñ märtebesindey boladı», – dep habarlağan Smolyakov. Al bank törağası Erbolat Dosaev atalğan agenttikti qwruğa 10 mlrd teñge swrağan. Vedomstvo qarjı narığın retteu jäne damıtu, sonday-aq twtınuşılardıñ qwqıqtarın qorğau funkciyalarımen aynalısadı.

Bwrın Qazaqstanda qarjı narığı men qarjılıq wyımdardı retteu jäne qadağalau agenttigi (QQA) jwmıs istedi. 2011 jıldıñ säuirinde joyılıp, memlekettik agenttiktiñ funkciyaları men ökilettikteri Wlttıq Bankke berildi.

"The Qazaq Times"