Japoniyanıñ jaña imperatorı Naruhito. Foto: AP

Japoniyada jaña imperatordı wlıqtau räsimi ötip, otız jıl taqta otırğan imperator Akihitonıñ wlı Naruhito tizgindi öz qolına aldı.

2016 jıldıñ tamızında imperator Akihito halıqqa joldauın jariyalap, densaulığı men jasın meñzegen sätten-aq, taqtan tüsetini jaylı naqtı aytpasa da, bilikti jaqın arada mwrageri Naruhitoğa tapsıratını belgili edi. Bilik tizginin Naruhito biıl 1 mamırda qolına aldı. Sol kezde halıqqa on kün demalıs berilip, dästürge say räsimder ötken.

Wlıqtau räsiminde imperator Naruhito sözinde: «Otız jıldan astam uaqıt boyı Asa märtebeli, qwrmetti imperator Akihito halqınıñ baqıttı boluın, älemdegi beybitşiliktiñ berik boluın tiledi. Men Japoniyanıñ birligi men memlekettiginiñ nışanı retinde Konstituciyağa säykes qızmet atqaramın», – dedi.

Bügingi jiınğa 174 elden 400 ökil qatıstı. Olardıñ 70-i monarhtar men memleket basşıları. Sonday-aq, imperatordı qwttıqtauğa japon qoğamınıñ barlıq toptarınan 1,6 mıñğa juıq ökilder şaqırıldı: biliktiñ zañ şığaruşı, atqaruşı jäne sot tarmaqtarınıñ basşıları, kabinet müşeleri jäne bwrınğı prem'er-ministrler, prefektur gubernatorları, ğalımdar, sportşılar, jazuşılar, käsipkerler.

Qonaqtardıñ qatarında Bel'giya, Butana, Ispaniya, Kambodja, Malayziya, Niderlandı korolderi, Birikken Korol'diktiñ mwrager hanzadası Çarl'z, Austriya, Ündistan, Vengriya, Filippin, Finlyandiya prezidentteri, AQŞ-tıñ kölik ministri Eleyn Çao, Resey Federaciya Keñesi törağasınıñ orınbasarı Il'yas Umahanov, QHR törağasınıñ orınbasarı Van Cişan' bar. Sonımen qatar, Japoniyağa Armeniya prezidenti Armen Sarkisyan, Gruziya basşısı Salome Zurabişvili, Qırğızstan prezidenti Sooronbay Jeenbekov, Ukraina prezidenti Vladimir Zelenskiy, Moldaviya prezidenti Igor' Dodon jäne Qazaqstannıñ bwrınğı prezidenti Nwrswltan Nazarbaev qatıstı.

Japon jwrtınıñ zañına säykes, patşa otbasında sayasi bilik joq. Alayda, Japoniyanıñ el birligi men wlt twtastığınıñ simvolı retinde patşa otbasına ülken qwrmet körsetiledi. Halıq narazı bolğan jağdayda ükimetti de auıstıruğa qaqısı bar.  Akihito patşanıñ twsında japon halqı talay auır künderdi basınan ötkergen. Akihito sonıñ bärinde şapağatşıl, halıqşıl patşa retinde este qalğan.

Naruhito – ekinşi düniejüzilik soğısta Tokio kapitulyaciyasınan keyin düniege kelgen birinşi japon monarhı. Ol Tokiojağı «Gakusyuin» elitalı universitetin jäne Oksfordtı tämamdağan. Jaña imperatordıñ jwbayı 55 jasar Masako – Japoniya diplomatınıñ qızı, Tokio universiteti men Garvardta bilim alğan.

"The Qazaq Times"