Eldiñ ortalıq qalasında keñ auqımda jürgizilip jatqan «Til tazalığı – barşağa ortaq is» jobasın elordamızdağı päter ieleri kooperativi de jürgizetin boladı.

         Osığan baylanıstı kezekti jinalıs bügin elordanıñ Almatı audanı äkimdiginde ötti. Oğan Almatı audanı äkiminiñ orınbasarı Samatwlı Maqsat, qalalıq Tilderdi damıtu jäne arhiv isi basqarmasınıñ mamandarı men sarapşı top ökilderi jäne päter ieleri kooperativiniñ basşıları qatıstı. Basqosuda qalalıq Tilderdi damıtu jäne arhiv isi basqarmasınıñ bas mamanı Aygül Imanğali PIK basşılarına jobanıñ maqsatı men zañ talaptarın tolıq tüsindirdi.

– Bügingi küni päter ieleri kooperativine qaraytın twrğın üylerdiñ aumağında, kireberisterde, liftilerde memlekettik tilge baylanıstı köptegen zañ bwzuşılıqtar bar. Köbinese tek resmi tilde ğana aqparat beriledi. Biz birige otırıp osı mäseleni retke keltiruimiz kerek. Sizder özderiñizge qarastı üylerdegi jarnama jäne özge de körneki aqparattı ornalastıru barısın qatañ qadağalap olardıñ memlekettik til zañına say boluın talap etuleriñiz tiis, öytkeni bwl sizderdiñ tikeley mindetteriñiz, – dedi Aygül Ğizatqızı.

Jiında qalalıq Tilderdi damıtu jäne arhiv isi basqarmasınıñ mamanı Güljan Qwrmanğaliqızı üylerge ornalasatın türli jarnama jäne körneki aqparattar Qalalıq säulet qwrılısı jäne jer qatınastarı basqarmasınıñ bekituinen ötui kerektigin ayttı. Zañsız ornalasqan, jarnama, aqparat nısandarı ielerine Memlekettik kiris basqarması tarapınan ayıppwl salınatının eskertti. Al, memlekettik tilde jazuğa baylanıstı kömek qajet bolsa basqarma mamandarı dayın ekenin, arnaulı bölim qızmetkerleri qate-dwrısın tekserip beretinin jetkizdi.

– Sizder aldımen til tazalığın öz keñseleriñizden bastañızdar, arı qaray basqa zañ bwzuşılıqtarlı retke keltiruge boladı – dedi Güljan Qwrmanğaliqızı PIK basşılarına.

Jinalısqa qatısuşılardıñ deni jobanıñ män-maqsatın wğınıp, oñ tüsinistik tanıttı. Keybir qatısuşılar jarnama ornalastıru, aqparattar men habarlandırular jazudıñ ülgisi ne dayın tetigi bolu kerektigin alğa tarttı.

– Bwnıñ bäri Qazaqstan Respublikasınıñ Til turalı zañında anıq jazılğan, osınşa uaqıttan beri sonı tüsinbey, äli de talap qoyıp, bärin dayındap berudi swrau dwrıs emes. Sizder kerisinşe bizben tize qosıp, akciyağa ün qosularıñız kerek. Öytkeni, memlekettik til zañın saqtau – Qazaqstanda twratın ärbir azamattıñ borışı, – dedi Aygül Ğizatqızı.

– «Til tazalığı – barşağa ortaq is» jobası qala äkiminiñ arnayı qaulısımen bekitilgen. Biz bwnı qoldap-quattauğa dayınbız. Qajetti mamandardı jiberip, akciya jwmısına barlıq jaqtan kömek beremiz, – dedi Almatı audanıñ äkiminiñ orınbasarı Samatwlı Maqsat.

Päter ieleri kooperativi basşılarına özderi qadağalaytın aumaqta til tazalığın jürgizuge eki apta uaqıt berildi. Arı qaray jwmısşı top atqarılğan jwmıstar boyınşa tekseru jürgizetin boladı. Ayta keteyik, PIK basşılarımen jwmıs qalanıñ qalğan üş audanında da jürgizilip jatır.

“The Qazaq Times”