21 tamız küni ötken Nur Otan partiyasınıñ Sayasi keñesi byurosınıñ otırısında eks-prezident köpbalalı äyelder men oralmandarğa qatıstı «keñes» berip, qoğamnıñ sınına wşırağan edi. Sol jiında N.Nazarbaev birneşe şeneunikti maqtap, rizaşılığın bildirgen bolatın.

Partiya lideriniñ «Meniñşe, orın alıp otırğan problema jayında ündemey qalu – jwmıstıñ eñ naşar nwsqası. Adamdardan tığılmay män-jaydı anıqtap, jauapkerşilikti moyınğa alu kerek. Bizde halıqqa şığıp, bwl swraqtarğa jauap beruden qorıqpaytın, problemalardı şeşetin äkimder de, ministrler de bar. Berdibek Mäşbekwlı (QR Ükimet basşısınıñ orınbasarı Saparbaev), vice-prem'er bolıp tağayındaluıñmen qwttıqtaymın. Bayağıdan beri osı jer seniñ ornıñ edi. Tört oblısta äkim boldıñ. Sonıñ bärin kördiñ. Bastağan kezde halıqtıñ arasında jürdik sol uaqıtta. Elmen söylesip jürdik. Aytqanımızdı el tüsinip jürdi», – degen bağasına ükimet basşısınıñ su jaña orınbasarı öz pikirin bildirdi. Jaña qızmetke tağayındalğan Berdibek Saparbaev özine aytılğan maqtauğa qatıstı:

– Älbette, kez kelgen adam üşin bwl jağımdı. Bwl söz odan arı jaqsı jwmıs jürgizu üşin meni jigerlendiredi, – dep jauap berdi baspasöz brifinginde. Sonday-aq bilikte  42 jıldıq täjiribesi bar eks-ministr Saparbaev üşinşi jwmıs küninde-aq tilşilermen kezdesip otırğanın, öziniñ osı uaqıtqa deyin aşıq bolğanın aytıp, aldağı uaqıtta da «özgermeymin» dep uäde berdi.

QR prem'er-ministriniñ orınbasarı Berdibek Saparbaev. Foto: kapital.kz

Bwdan bölek jas kadrlardı, äsirese «Bolaşaqpen» bilim alıp kelgen mamandardı aymaqta pisip-jetildirip, bilikke tartu qajettigin aytqan Nazarbaev basqaruşılardıñ jaña buını qatarınan Altay Kölginovti öñirdegi eñbegin maqtap, köpke ülgi etken edi. El astanasın jaz bastalğalı beri basqarıp kele jatqan jas äkim Kölginov «Bolaşaq» bağdarlamasınıñ tülegi, Wlıbritaniyada bilim alğan. Bügingi wstazdardıñ Tamız keñesinen keyin äkim «Men mwnı «avanspen» aytılğan maqtau dep qabıldadım. Men bwl ümitti aqtauım kerek. Eñ bastısı, el basşılığı men halqımızdıñ mağan artqan senimi. Men üşin bastı basımdıq – osı», – dedi.

El astanasınıñ jaña äkimi Altay Kölginov. Foto: sputniknews.kz

Tüyin: Ne de bolsa eks-prezident salğan jüyede tärbielengen äkim-qaralar minbedegi eki söziniñ birin «Elbası tapsırması boyınşa» dep bastaytını qadımğı dästür. Arıs oqiğasınan soñ ministrler men äkimder tügel jwbatu-tüsindiru sözderin halıqtan emes, Toqaevtan emes, «Elbası aytqanday» dep kösilgen edi. Şın mäninde mwnıñ bäri el aldında anıq körinip twradı. Osını eskerse eken, şendiler. Maqtau estigen jaqsı, layıq bolsa. Eñbektiñ elengenine ne jetsin. Biraq Halıqtıñ alğısı, bir atı bolğan Qwdaydıñ «rizaşılığı» bolsa kerek-ti.

"The Qazaq Times"