AQŞ prezidenti Donal'd Tramp. Foto: Associated press

Aq üy prezidenti bastı qauip retinde atıs qarularınıñ psihikalıq auıtquı bar adamdardıñ qolında boluı dep sanaydı.  

Qarapayım azamattarı tarapınan qoğamdıq orındarda jappay oq judıru deregi boyınşa tanımal AQŞ memleketinde soñğı jıldarı «Atıs qaruınıñ qoljetimdiligi» turalı pikirtalas qıza tüsken.

Keşe prezident Donal'd Tramp qaru satıp aluşılarğa qatıstı tekserudi qatañdatu wstanımın qoldaytının mälimdedi. Onıñ aytuınşa, köp jağdayda jappay atu äreketine psihikası sau emes adamdar bastamaşılıq etedi. Bwl mäseleni şeşu üşin prezident AQŞ-ta jaña psihiatriyalıq auruhanalar aşudı wsındı.

Tramp Senattağı respublikalıqtardıñ köşbasşısı Mitç Makkonnellmen jäne özge de  respublikaşılarmen atıs qaruın qoldanu jäne zorlıq-zombılıq mäselesi turalı söyleskenin mälimdedi. Tramp habarlamasında partiyadağı äriptesteriniñ de «essiz äri qauipti, qısastıq niettegi jauız adamdarğa atıs qaruın barınşa qoljetimdi etpeu qajettigin» qalaytını aytılğan.

Reuters agenttiginiñ aqparatınşa, Tramp «Biz aram piğıldılar men es-aqılında auıtquı bar pacientterdiñ  qandayda bir qaruğa ielik etuin qalamaymız. Olar tapanşa şürippesin basadı. Tapanşa özdiginen atıladı. Biz psihikalıq nauqastarğa nazar audaruımız kerek»,– degen. Reakciyaşıl prezident qoğamnıñ bwl mäselege jiti nazar audaruı kerektigin aytıp äri  1960-1970 jıldarı AQŞ-ta köptegen psihiatriyalıq auruhanalar jabılğanın eske saldı. Ondağı emdeluşileri eş baqılausız üylerine jiberilip, em şarasız qalğandığımen öz sözin tolıqtırdı.

Prezidenttiñ pikirinşe, psihikalıq auru adamdarğa kömek körsetu üşin osınday ülgidegi jaña emdeu orındarın aşu qajet. «Biz olardıñ köşede qaluına jol bermeuimiz kerek», – dep qorıtındılağan Tramptıñ kezekti wsınısı AQŞ köpündi BAQ betteri men el arasında qızu talqığa tüsude.

Osıdan bir apta bwrın AQŞ-tıñ 200-den asa qala merleri Senatorlar özderiniñ jazğı demalısın üzip, şwğıl türde «Atıs qaruların satuğa baqılaudı küşeytu turalı» zañ jobasın qabıldauın talap etken edi. Mwnday wsınıs El'-Paso (Tehas ştatı) jäne Deyton (Ogayo ştatı) qalalarındağı 31 adam ölimimen orın alğan qandı oqiğadan keyin birneşe kün ötken soñ jasalğan. Zertteu instituttarınıñ derekter bazasına säykes, 13 sağat işinde eki ştatta birinen soñ biri bolğan qayğılı oqiğa – osı jıldıñ basınan bergi 21-şi jäne 22-şi jappay kisi öltiru faktisi. Jalpı jappay kisi öltiru oqiğası retinde şabuıldauşını qospağanda 4 adamnıñ qaza tabuımen esepke alınadı. Basqa mälimetter boyınşa, jıl basınan beri tört kisiden az jaralanğan ya köz jwmğan oqiğalar sanı 250-den asadı.

El'-Paso qalasınıñ Walmart dükeni mañındağı köpşilikke jappay oq jaudıru oqiğasınan keyngi aza twtu şarası. Tehas ştatı. 5 tamız 2019 jıl. Foto: Reuters agenttigi

"The Qazaq Times"