Şildeniñ 6-sı, astana küni merekesinde Almatı qalasında sağat şamamen 19:15-19:50 aralığında Almatı qalasınıñ Ortalıq stadion men Baluan Şolaq atındağı sport keşeni (Abay dañğılı men Baytwrsınov köşesiniñ qiılısı)  mañayına jinalğan jwrtşılıqtı jäne jürginşilerdi wstau jiilep, arnayı jasaq ta küşeytilgen tärtipte jwmıs jürgizgeni bayqaldı.

«Miliciyalar mwnda ne istep jür?», «Arısqa barmay ma?», «Alayaqtardıñ izine tüspey me?» dep bir top äyelder öz pikirin bildirse, keybir azamattar «Alğa, Qazaqstan!», «Oyan, Qazaq!», «Bostandıq» dep wrandap jattı.  Qaysıbir azamattar «zañsız» mitingige arnayı kelgenin aşıq jariyalap, al keybiri jay ğana merekelik seruende seyildep jürgenin ayttı. Tipti wstau jiilegen twsta avtozaktar aldında birneşe wstaluşı qoldarı qayırılğan küyde kezekte kidirip twrıp qaldı. 19:28-de özin Kümisbek Besjan dep tanıstırğan memlekettik tu asınıp, basına wlttıq örnekti taqiya kigen jas jigit te wstaldı. Wstalğandardıñ qatarında körnekti kösemsözşi, aqın Mırzan Kenjebay da boldı. Birşama wstaulardan soñ egde jastağı birneşe zeynetker, äyel azamattar policiyanıñ äreketine narazılıqtarın bildirip, twtqındaudı tıyudı talap etti.

Aragidik, äsirese sağat 19:30-darğa tayau köşe boyında avtokolonnalıq signaldar dauısı zoraya tüsti. Birneşe kölik iesi signal bergeni üşin jol boyında toqtalıp, avtozakqa mingizilip, jeñil kölikterdi arnayı jol-patrul'dik evakuatormen alıp ketti. Oqiğa ornına twrğındar men jürginşilerdi  tarauğa policiya qızmetkerlerimen birge Almalı jäne Bostandıq audandarınıñ äkimderi Bekqali Torğaev pen Altay Raqımbekov te keldi. Olar atalmış jiınnıñ zañsız ekenin eskertip, oğan qatısuşılarğa şara qoldanılatının ayttı.

Keşki 21:30-dar şamasında QR İşki ister ministrligi feysbuk paraqşasında arnayı mälimdeme jariyaladı. Onda policiya bölimderine jetkizilgen zañsız miting wyımdastıruşıları men belsendi qatısuşılarınıñ keybireuinen «tütindegiş qwtı jäne travmatikalıq qaru» alınğanın aytılğan. Sonday-aq  qwqıq qorğau ökilderi tarapınan «tärtip bwzuşılardı wstau barınşa sauattı jürgizildi, arnayı qwraldar qoldanılğan joq» dep qorıtındılanğan.

Osığan deyin QR aumağında ekstremistik wyım retinde tanılıp, jwmısına tıyım salınğan «Qazaqstannıñ demokratiyalıq tañdauı» («QDT») qozğalısınıñ basşısı Mwhtar Äblyazov köpşilik azamattardı internet arqılı 6 şilde jappay narazılıq şarasına şaqırğan edi. Jalpı Almatıda ötken sankciyalanbağan jiında 100-den asa azamat wstaldı.

“The Qazaq Times”