Ötken aptanıñ soñında Qıtaydıñ Şınjañ provinciyasındağı Şiñgil audandıq Halıq sotı Qıtay qazaqtarınan şıqqan käsipker, mecenat Mamırbek Köpjasarwlı bastağan 13 qazaq azamatın 1 jıl 6 aydan  20 jılğa deyin qamaq jazasına kesti. 

Sot ükiminde Mamırbekke wyımdasqan qılmıstıq top qwru, qastandıq wyımdastıru, zañsız kazino qılmısı, qaru-jaraq paydalanu qılmısın bwzu, oq-däriler men qaru-jaraqtı saqtau, basqa ayıptaluşılarmen birlesip, «№147» altın kenine şabuıl jasau, jwmısşılardı wrıp soğu, memlekettik müllikke ziyan keltiru, t.b. tolıp jatqan ayıptardı artqan.

Foto: v.qq.com.

Sot tarabı olardıñ qılmısı memleket zañın elemeu jäne qoğam amandığı men tınıştığına auır nwqsan keltiru dep qarap, ayıptaluşı 13 azamattı jeke-jeke 1 jıl 6 aydan 20 jılğa deyin bas bostandığınan ayırğan.

Şınjañ jerindegi bwl sot isi turalı türli pikirler qazir qazaq tildi äleumettik jelide tarap jür. Qıtay ükimeti Şınjañda ekstremizm men terrorizmge qarsı kürespen qatar, «Qoğamdağı zwlım küşterge qarsı küres» nauqanın da bastağanı belgili. Kezekti sot isi de sol küres nauqanınıñ ayasında bolğanı anıq. Osı nauqannıñ jeleuimen Qıtaydağı alğabasar qazaq azamattarınıñ swraqsız, sotsız qamalıp jatqandarı da bar.

Qıtay biligi 2017 jıldan bastalğan “Üyrenu lagerlerine” jasırın toptap toğıtudan tıs alğaş ret aşıq sot ötkizip etnikalıq qazaqtardı toptıq sottap otır.

“The Qazaq Times”