Foto: kaztrk.kz

23 aqpan küni sağat 11.00-de Qarasay audanınıñ ortalığı – Qaskeleñniñ «Mädeniet üyinde»  aqın Esenqwl Jaqıpbektiñ öleñderine jazılğan änderden respublikalıq  änşiler konkursı boladı. Al aqpannıñ 24-i küni,  sağat 15.00-de bayqau jeñimpazdarın marapattau saltanatı jäne Qazaqstannıñ öner jwldızdarınıñ qatısuımen gala-koncert ötedi.

Atalmış şaranıñ barısı turalı wyımdastıruşılardıñ biri, kompozitor  Bağlan Omarov bılay deydi:

«Äleumettik jeli degen qazir jaqsı boldı ğoy.   Atalmış konkurs turalı öner adamdarına jiberip, instagram men feysbuk arqılı jarnama jasatqanmın. Sodan keyin de biraz ötinişter kelip tüsti. Lirik aqın – Esenqwl ağanıñ öleñderin qazaq jwrtşılığı jaqsı köredi. Maqsatımız onıñ öleñderin, änderin keñinen nasihattau. Sol sebepti de osınday bayqau jariyaladıq. Qazirgi kezde 60-qa tarta adam qatısuğa tilek bildirdi. Ötiniş jibergen qatısuşılar 23-i küni tañerteñ 9-da jinalıp jerebe tastaydı da, 11-de sol rettik nömiri boyınşa öner körsetedi. Konkursta ärbir qatısuşı eki ännen orındaytın boladı. Biri Esenqwl ağanıñ sözine jazılğan än boluı kerek. Al ekinşisi öz tañdauı, eger ol da Esenqwldıñ äni bolıp jatsa qwba-qwp. Aqmola, Şığıs Qazaqstan, Batıs Qazaqstan, Oñtüstik, Almatı, t.b. Qazaqstannıñ tükpir-tükpirinen qatısuşılar keledi. 23-i küni är qatısuşını tıñdaymız da, kelesi küni gala-koncertte  jeñimpazdardı anıqtap, sıylıqtarın tabıstaymız. Koncertke öner jwldızdarı qatısadı jäne konkurs barısında jaqsı şıqqan 4-5 qatısuşı öner körsetedi».

Ayta keteyik, Esenqwl Jaqıpbektiñ sözine jazılğan änder bayqauınıñ ötkiziluine qarjılay kömek körsetip, sponsorlıq etip otırğan Almatı oblısı, Qarasay audanınıñ äkimi – Mahabbat Bigeldiev.

Konkurs qatısuşılarına beriletin  qarjılay sıylıq: Üşinşi orınğa 100 mıñ, ekinşi orınğa 150 mıñ, birinşi orınğa 300 mıñ jäne bas jüldege 500 mıñ qarjılay sıylıq beriledi. Odan bölek ärbir qatısuşılarğa Esenqwl Jaqıpbektiñ tañdamalı öleñder jinağı beriledi. Wyımdastıruşılardıñ aytuınşa, konkurs barısında aqınnıñ öleñderine jazılğan jaqsı jaña  änder orındalıp jatsa, olarğa da arnayı sıylıqtar dayın.

Qazılar alqasında müşe bolatın: Oblıstıq mädeniet departamentiniñ basşısı Aqan Äbduäliev, jazuşı Jwmabay Şaştaywlı,  Qarasay audanınıñ mädeniet jäne tilderdi damıtu basqarmasınıñ basşısı Ermek Jwmataev, kompozitor Bauırjan Esebaev, änşi Sayat Medeuov, kompozitor Bağlan Omarov.

Al gala-koncertke Bekjan Twrıs, Sayat Medeuov, Dosımjan Tañatarov, Bağlan Äbdrayımov, Äset Esjan, Qanat Ümbetov pen Äliya Äbiken, t.b. öner ieleri qatısadı.

Eske sala keteyik, ötetin ornı: Qarasay audanı, Qaskeleñ «Mädeniet üyi».

Än bayqauınıñ 23 aqpan küni sağat 11.00-de, al gala-koncert  24 aqpanda sağat 15.00-de boladı. Kiru tegin.

«The Qazaq Times»