Alataudıñ eñisi jazılğan däl etegindegi botanikalıq baqtan bereke ketkeli qaşan?! It süyregen tulaqtay jwlım-jwlım bolğan orındı osığan deyin talay qarjıger qwlpırtpaq edi. Tipti, jobaların qağazğa tüsirip, şendilerge tanıstırıp ta jattı. Mwnı estigen jwrttıñ börkin aspanğa atqanı bar. Biraq bau-şarbaqtıñ şırayın keltiremin deuşilerden sol küyi "aqjoltay" habar estimedik. Jelpine jeñ türgenderdiñ üni şıqpay qaldı, solıñqı baq ta sol küyi türlenbedi.

Almatıdağı botanikalıq baqtıñ jalpı aumağı 100 gektarğa juıqtaydı. Onda qızıl kitapqa engen ösimdikterdiñ 5 mıñday türi kezdesedi. Biraq baqqa bas-köz bolatın adam tayauda tabılmasa, onda tabiğattıñ osınau tartuın talğajap bitetin türimiz bar.

Foto: QT

Botanikalıq baq - Bilim jäne ğılım ministrliginiñ qarauında. Öytkeni, ol tek älemde sirek kezdesetin ösimdikter şoğırlanğan orın ğana emes, sonday-aq ol - ğılım ordası sanaladı. Mwnda talay tıñ zertteuler jasalıp, nebir jañalıq ta aşılğan.

Sonımen qatar, botanikalıq baq Almatı qalasınıñ aumağında ornalasqandıqtan, oğan qala biligi de jauaptı. Alayda törde otırğandardıñ bwğan bas auırtqısı kelmeytin sındı. Äytpese, köz qırın salar bolsa,  äygili baq qazirgidey müsäpirdiñ küyin keşpes edi.

Serjan Jwmaşov, käsipker. Foto: forbes.kz

Bauırjan Baybek basqaratın qalalıq keñes jadaulanğan baqtıñ jayın osıdan birer jıl bwrın söz etken-di. 2015 jılı belgili käsipker Serjan Jwmaşov ol jerge muzey twrğızamın dep, jelpinip edi. Tipti, Ispaniyadan äygili säuletşini şaqırıp, bwl isti tayauda tındıruğa uäde bergen. Keyin, bir jıl ötkende keñeske qayta kelip, qosımşa oylarımen bölisti. Ol wsınğan joba boyınşa botanikalıq baqta jaña oranjereyalar, klimatron, jılıjaylar jäne müsinder bağı aşılatın bolğan. Biraq sol jiında aytılğan söz - is jüzinde naqtı jüzege aspadı.

Serjan Jwmaşov salmaq bolğan muzeydiñ nobayı. Foto: buro247.kz

Investorlar bos uäde berdi delik, biraq qala basşılığı mwnday salğırttıqqa nelikten köz jwmıp otıra beredi? Qarjıgerler qwlıqsız bolsa, qala biligi ärekettenbey me? Älde berekesi ketken älgi baqqa ädeyi araşa tüspey otır ma?

Şıntuayında, Almatıdağı bas botanikalıq baq - memlekettik qorğauğa äldeqaşan alınğan.  Qağaz küyinde ğana qorğalğanı bolmasa, "qazınağa" qaraylap jatqan eşkim joq. Jauaptılar töñirekti tegis qorşağanımen,  işindegi ösimdik bitken japırılıp jatır. Sondıqtan bwl mäsele juırda şeşimin tappasa, "qala jaqwtın" joğaltıp aluımız bek mümkin...

“The Qazaq Times”