Qıtay biligi Şıñjañ Wyğır avtonomiyalıq audanındağı ärbir mwsılman otbasına Kommunistik partiyanıñ ökilderin ornalastıruğa tübegeyli şeşim şığardı, dep habarlaydı islamianaliz.com agenttigi.

Osılayşa, ärbir mwsılman otbasına millionnan astam kommunistti ornalastıru josparlanuda. Biliktiñ bwl şeşimi «terrorizm, separatizm jäne dini ekstremizm küşterine» qarsı nauqan ayasında qabıldanğan. Atalğan aqparat agenttiginiñ habarlauınşa, kommunister mwsılmandardıñ üylerinde ay sayın kem degende bir apta twratın boladı. Endi bwdan bılay, dindes bauırlarımız «şaqırılmağan qonaqtarına» özderiniñ jeke ömirleri men sayasi közqarastarı turalı tolıq bayandap beruge mindetti.

Odan bölek, basqaruşı partiya ökilderi mwsılmandarğa arnap «sayasi sauatsızdıqtı joyu» kurstarın jürgizbekşi. Halıqaralıq adam qwqıqtarın qorğau wyımı (Human Rights Watch) KHR-nıñ bwl bastamasın Şıñjañ Wyğır avtonomiyasındağı twrğındardıñ qwqıqtarın bwzuşılıq dep atadı. «Özderiniñ jürgen-twrğandarı men istegen isterin bağıp-qağıp, añdıp otıratın adamdardı üylerine ornalastıruğa küştep köndiruden artıq tağı qanday qatigezdik bolsın?», - dedi HRW wyımınıñ Qıtay isteri jönindegi mamanı Maya Van. Bwdan bwrın da şamamen 120 mıñ mwsılmannıñ Qaşğar qalasındağı sayasi bilim beru lagerine jiberiletindigi habar tarağan edi. Biletinderdiñ aytuınşa, ol jerde mwsılmandardı revolyuciyalıq änder jattauğa, qıtay tilinde söyleuge mäjbürleytin körinedi.

Qıtaydağı mwsılmandar degende, onıñ işinde özimizdiñ de qaraköz qandastarımız bar. Bwl mäsele — qazaq qoğamınıñ bügingi tañdağı eñ bastı dertine aynaluda. Arğı bettegi ağayın osılay jazıqsız qısastıq körip jatqanda, bizdiñ biliktiñ araşa tüsetin uaqıtı kelgen siyaqtı.

“The Qazaq Times”