Birikken Arab Ämirliginde birneşe otandasımız astan ulandı. Olar tanımal qonaq üyde tañğı astarın işip, izinşe därigerlerdiñ kömegine jappay jügingen. Tipti, infekciya jwqtırğandardıñ arasında balalar da bar eken. Qazir astan ulanğan birneşe qazaqstandıq otbası elge qaytıp ülgerdi. Olardıñ köbi Astana jäne Almatı qalalarındağı auruhanalarda jatır.

Foto: tengrinews.kz

The Qazaq Times tilşisi arab eline sayahattauğa barıp, qapıda jwqpalı dertke şaldıqqan nauqastardıñ birimen telefon arqılı söylesti. Äsel Jarasqaliqızı esimdi twrğın bolğan jayttı egjey-tegjeyli bayandap berdi. Aytuınşa, qonaq üyde wzın-ırğası 200-ge juıq turist tamaqtan ulanğan eken. Olardıñ 50-ge jeteğabılı bizdiñ elden sayahattap barğandar. Qalğanı Resey, Ukraina jäne Belarus' eliniñ turisteri. Ulanu deregi tirkelgen soñ, jergilikti därigerler nauqastardıñ barlığına alğaşqı kömek körsetken. Keyin, turistik kompaniyalar otandastarımızdıñ elge qaytuına septesipti. Bizge belgilisi - qazir on şaqtı otbası Qazaqstanğa oralıp ülgergen. Olardıñ biri Almatıdağı auruhanada jatır. Mwndağı därigerler astan ulanğan älgi nauqasqa sal'monellez diagnozın qoyıptı-mıs. Qalğandarınıñ qanday dertke şaldıqqanı äzirge anıqtalmadı.

Foto: tengrinews.kz

Tamaqtan ulanıp, jağdayı kürt naşarlağandardıñ arasında Äsel Jarasqaliqızınıñ otbası da bar. Äsirese, 1 jastan asqan balasınıñ jağdayı tım auır. Bauırına zaqım kelgen bwldirşin Astanadağı jwqpalı aurular auruhanasınıñ jan saqtau böliminde jatır eken.

Osı twsta, jwqpalı dertke şaldıqqan otandastarımız turistik kompaniyalar men saqtandıru mekemelerinen sayahatqa ketken şığındarın ötep alatındarın mälimdedi.

“The Qazaq Times”