Zeynetaqı qorı ötken jılı qwndı qağazdar narığında bereşekke belşesinen batqan biraz kompaniyadan qarızdarın öndire bastadı. 2014 jılı qorda wzın-ırğası 32 problemalıq emitent bolsa, qazir olardıñ 20-sı ğana qalğan. Bwl turalı zeynetaqı qorınıñ baspasöz qızmeti habarladı.  

Zeynetaqı aktivteri boyınşa qaytarılğan qarız kölemi 1,25 mlrd teñgege juıqtaydı. Qor basşılığı jüyeli jwmıstı biıl da jalğastırudı josparlap otır. Olar mindetterin orındamay otırğan iri kompaniyalardıñ 5 lauazımdı qızmetkerin sotqa bergen eken. Qazir osı is boyınşa tergeu amaldarı jürip jatır.

Şıntuaytında, problemalıq emitentterden bereşek öndiru - oñay emes. Deni kompaniyaların "bankrot" dep jariyalap, qarızdan sıtılıp ketudiñ jolın izdeydi. Mäselen, bıltır zeynetaqı qorı «Qazaqstan Qağazı» kompaniyalar tobınıñ bwrınğı akcionerleri men direktorlarınıñ üstinen qwzırlı orındarğa şağımdanğan eken. Londonnıñ joğarğı sotı arızdanuşı taraptıñ şağımın qanağattandırıptı. Alayda küdikke ilingender iri kompaniya bankrotqa wşıradı dep, jauaptan jaltarıp ketui bek mümkin.

Qazir zeynetaqı qorınıñ investiciyalıq portfelinde 20 problemalıq emitent bar. Olardıñ qor aldındağı jalpı bereşek kölemi - 41,15 mlrd teñge.

“The Qazaq Times”