Soltüstik Koreyanıñ yadrolıq poligonı ornalasqan aymaq. Foto: Newspeakonline.

Ötken aptanıñ soñında Soltüstik Koreya basşısı Kim Joñ Un (Kim Çen In/ Kim Jong Un) mälimdeme jasap, KHDR-nıñ qwrlıqaralıq ballistikalıq zımıran sınaqtarın toqtatıp, eldiñ soltüstigindegi yadrolıq poligondı jabatının jariya etken edi. KHDR basşısı mwnday sınaqtardıñ endi Soltüstik Koreyağa keregi qalmağanın, biraq yadrolıq qarudı jasap bolğanın aytqan.

Soltüstik Koreyanıñ resmi BAQ-ı: «Sınaqtardıñ toqtatıluı – Korey tübeginiñ qauipsizdigi jäne ekonomikalıq damu üşin», – dep jazdı. Oñtüstik Koreyanıñ «Ionhap» agenttigi bwl mälimdemeniñ KHDR Jwmısşılar partiyasınıñ jinalısında jariyalanğanın atap ötti.

Atalğan bayandamada, eger qauip-qater bolmasa Soltüstik Koreya yadrolıq qarudı mülde qoldanbaytını aytılğan. Bwğan qosa, qanday şart bolsa da yadrolıq qarudı sırtqa şığarmaytını turalı da mälimdegen.

Bwl turalı Qwrama Ştat prezidenti Tramp öziniñ «Tvitter» paraqşasına: «Bwl Soltüstik Koreya jäne düniejüzi üşin ülken progress. Men bizdiñ kezdesudi tağatsızdana kütemin», – dep jazdı. Esteriñizde bolsa naurız ayında Tramp kütpegen jerden Soltüstik Koreya basşısınıñ kezdesu turalı wsınısın qabıl alğan edi. Bwl osığan deyin Qwrama Ştat prezidentteriniñ birde biri jasamağan qadam bolatın. Degenmen, kezdesudiñ naqtı uaqıtı äli de anıq bolmay keledi. Tramp alğaşqı sözderinde birinde «mausımnıñ bas şeninde boluı mümkin» degen mälimet tarağan. Keyin mamır ayında bolatını turalı aytıldı.

Habarlarğa qarağanda, kelissözge dayındıq maqsatında Soltüstik Koreyağa AQŞ Ortalıq Barlau Agenttiginiñ jetekşisi Mayk Pompeo barıp qaytqan.

Soltüstik Koreya älemnen oqşaulanıp qalğan elderdiñ biri. Qazirge deyin altı ret yadrolıq sınaq jasağan. Onıñ sırtında köp ret qwrlıqaralıq ballistikalıq zımıran sınaqtarın jasadı. Bıltır Soltüstik Koreya qwrlıq aralıq ballistikalıq zımıran jasauda joğarı nätije körsetip, özderiniñ yadrolıq qaru tasığış zımırandarınıñ Qwrama Ştattıñ kez-kelgen qalasına jetkize alatının körsetti. Bwl jetistigi AQŞ-tı jäne älem elderin yadrolı soğıs qauipimen alañdatqan edi.

Biraq, biıl jıl basınan beri KHDR basşısı öziniñ sırtqı sayasatın özgertip, yadrolıq jäne zımıran sınaqtarın toqtatıp, Oñtüstik Koreya jäne onıñ odaqtası AQŞ-pen kelissözge dayın ekenin jetkizgen bolatın.

“The Qazaq Times”