Türkiya prem'er-ministriniñ orınbasarı Bekir Bozdag.

AQŞ Sırtqı İster Ministrligi AQŞ ükimetiniñ Afrindegi oqiğalarğa alañdauşılıq bildiretinin mälimdegennen keyin, Türkiya prem'er-ministriniñ orınbasarı Bekir Bozdag AQŞ-tıñ "Zäytün bwtağı" operaciyasınıñ maqsatı men män-jayın äli tüsine almağandığın nemese tüsingisi kelmeytinin aytıp, Aq üy mälimdemesimen kelise qoymaytındığın jasırmadı.

Ol "Twitter" äleumettik jelisindegi paraqşasında jasağan mälimdemesinde: "Zäytün bwtağı" operaciyası DAIŞ-pen küres äreketterine keri äserin tigizude degen pikir negizsiz äri jalğan. "Zäytün bwtağı" operaciyası jazıqsız twrğındar men kürd azamattarına qarsı wyımdasqan top emes. Ol - terrorlıq wyımdarğa qarsı wyımdastırılğan qozğalıs. Aymaqtı terrorlıq toptardan arıltudı, halıqtı olardıñ qısımdarı men zwlımdıq äreketterinen qwtqarudı, aymaqta tınıştıq, beybitşilik, twraqtılıq jäne qauipsizdik ornatudı közdegen wyım. DAIŞ wyımı eñ köp terrorlıq äreket jasağan, sonımen qatar, DAIŞ-qa qarsı öte tiimdi jäne şeşuşi kürester jürgizgen äri DAIŞ-qa eñ ülken soqqı jasağan el — Türkiya" , - dep, taqırıpqa asa qatısı bola qoymasa da, DAIŞ-tıñ Türkiyağa tigizgen ziyanın da aytıp qaldı.

"Demokratiyalıq odaq"  partiyası (PYD) men "Kürdterdiñ halıqtıq qorğau otryadı" (YPG) terrorlıq wyımdarınıñ Siriya Demokratiyalıq Küşteri (SDG) degen ataumen qoldau tauıp jäne DAIŞ-tı sıltauratıp olardıñ qarulandırılıp, jasaqtalğanın da tilge tiek etken Bozdag, "Eñ bir kökeyge qonımsız bolğanı — aymaqta terrorlıq dälizdiñ, terrorlıq memlekettiñ qwrıluına qoldau körsetetin qadamdardıñ jasaluı, Türkiyanıñ basındağı qiın jağday men türik ükimetiniñ jasağan eskertulerin elemeu, Türkiyamen ıntımaqta boludıñ ornına terrorlıq wyımdarmen ıntımaqta bolu. "Zäytün bwtağı" operaciyası azamattarğa eşqanday ziyan keltirmedi. Kerisinşe, olardıñ su, däri-därmek jäne özge de gumanitarlıq kömekterge qol jetkizulerine eşqaşan kedergi bolmadı", - dedi.

Mäseleniñ astarına üñilsek, AQŞ Sırtqı ister ministrliginiñ baspasöz hatşısı Hizer Noyert Afrinnen soñğı 48 sağatta jetken habarlarğa baylanıstı qattı alañdaytının bildirip, Türkiyanıñ "Zäytün bwtağı" operaciyasına kinä artqan bolatın. Ol öz mälimdemesinde atalğan operaciyanıñ terrorlıq wyımdarmen küreske keri äserin tigizip jatqandığın aytqan edi.  Qazirgi uaqıtta Türkiya ükimeti atalğan mäselege qatıstı tolassız mälemdemeler jasauda. Älem köz tikken Afrindegi oqiğalar men "Zäytün bwtağı" operaciyasına qatıstı memleketaralıq daudıñ soñı nemen biteri äzirge bwlıñğır.

“The Qazaq Times”