Tramp jäne Kim Joñ Un. Foto: telam.com.ar.

Şveciya Sırtqı ister ministrliginiñ keşe jasağan mälimdemesinde, Soltüstik Koreya joğarı lauazımdılarınıñ biri sol küni keşte Stokgol'mge barıp, sol eldegi eki kündik resmi saparın bastaytını aytılğan. Bwl is AQŞ prezidenti men KHDR basşısınıñ kezdesuine jol aşuı mümkin dep qaraydı WJS basılımı.

Şveciya SİM-iniñ mälimdemesinde: «Soltüstik Koreyanıñ SİM basşısı Ri Ioñ Ho (Ri Yong Ho) beysenbi jäne jwma künderi Şveciyada resmi saparda boladı jäne Şveciya sırtqı ister ministri Margot Ualstrommen kezdesu ötkizedi»,–  delingen. Şveciya SİM ökili eki el lauazımdıları soñğı kezdegi ıntımaqtastıq qadamdarın jedeldetu jäne Korey tübeginiñ jalpı jağdayı turalı keñesetinin aytqan. Bwdan sırt kezdesude AQŞ pen Soltüstik Koreya arasındağı diplomatiyalıq isterdiñ jandanuına Şveciyanıñ atqaratın röli turalı da aqıldaspaq.

Şveciya – Soltüstik Koreyamen diplomatiyalıq baylanıs ornatqan sanaulı ğana Batıs elderiniñ biri. Sonımen birge köp jıldan beri Soltüstik Koreyadağı AQŞ-tıñ diplomatiyalıq müddelerin qorğauğa jauaptı bolıp keledi. Aytalıq, Soltüstik Koreyada wstalğan amerikalıqtardı bosatu jäne eline qaytaru isine kömektesken.

Şveciya SİM ökili jwma küni ötetin Ualstrom men Ri Ioñ Ho arasındağı kezdesude AQŞ ökilderiniñ qatısuı da mümkin ekenin aytqan. Sonday-aq Tramp pen Kim Joñ Un arasındağı kezdesu isin aqıldasuı mümkin ekenin de joqqa şığarmaydı.

Soltüstik Koreya resmi basılımdarınıñ keşegi habarında, Ri Ion Ho Beyjiñ saparınan oralğannan keyin, sırtqı elderdiñ jağdayın oylastıra kele, Kim Joñ Un men Tramptıñ kezdesui turalı aldın ala ötetin keñesti Şveciyada ötkizudi josparlağanın jazğan.

Qıtay Sırtqı ister ministrligi jasağan mälimdemede bwl aytılğandardı rastağan.

“The Qazaq Times”