Bügin QR sırtqı ister ministri Qayrat Äbdirahmanov Resey, Iran jäne Türkiyanıñ sırtqı ister ministrlerimen kezdesti. Äbdirahmanov kelissöz kezinde Süriyadağı qaqtığıstı şeşu üşin jaña qadamdar jasau qajettigin ayttı.

"Jaña qadamdar jasau qajet. Älemdik qauımdastıq, tipti deeskalaciyalıq aymaqtardıñ özi zorlıq-zombılıqqa äkep soqqan qauipti qaqtığıstardıñ kuäsi boldı", - dedi ol kezdesu kezinde.

Ministr sonday-aq, qaqtığıs saldarınan halıqtıñ onıñ işinde äyelder men balalardıñ qwrban bolğanın atap ötti.

"Büginde Süriyadan bayqap otırğanımız tek qana deeskalaciya men öñirdegi twraqtılıqqa qater töndirip qana qoymay, tipti  jağdaydı sayasi twrğıdan retteuge kedergi keltirude. Astanada qol jetkizilgen kelisimder qağaz jüzinde qalmau kerek. Eger kelissöz procesi kezinde süriyalıq tarap pen halıqaralıq qauımdastıqtıñ küşine qoldau körsetilse, olar naqtı nätijeni şığaru qajet. Osığan baylanıstı  Qazaqstan Süriyadağı qaqtığıstı tezirek rettegisi keletin barlıq qatısuşılardı, onıñ işinde Süriya ükimetin, qarulı oppoziciya ökilderin jäne BWW Qauipsizdik Keñesiniñ 2401 qararınıñ orındaluına ıqpal etui mümkin barlıq elderdi qantögisti toqtatuğa şaqıradı", - dedi ministr.

Sonday-aq, Äbdirahmanov osı mäselede Resey men AQŞ-tı konstruktivti dialog ötkizuge şaqırdı.

"Süriyadağı jağdaydı retteuge baylanıstı eki eldiñ ıntımaqtastığı osı iske qızığuşılıq tanıtıp otırğan barlıq taraptıñ müddesine jäne jalpı süriyalıqtardıñ müddesine jauap beredi", - dedi Äbdirahmanov.

Ministr bwdan bölek, Qazaqstan bwl qaqtığısta beytarap jäne ob'ektivti deldal retinde barlıq müddeli taraptarğa kömek körsetudi jalğastıra beretinin atap ötti.

Ayta keteyik, bwdan bwrın reseylik äskeri wşaqtardıñ kömegimen süriyalıq äsker Şığıs Gutanı bombağanı turalı aqparat tarağan edi. Bombalau saldarınan jüzdegen adam qaytıs bolıp, 6 auruhana men medicinalıq ortalıqtar qiradı. Süriyanıñ azamattıq qorğanıs qwtqaruşıları "jergilikti halıq arasında ulı hlor gazdan ulanğandar bayqaladı" dep mälimdegen. Biraq Reseydiñ SİM-i Sergey Lavrov gazğa baylanıstı aqparattı "jalğan" dedi.

 “The Qazaq Times”