Şığıs Qazaqstan oblısında qwtqaruşılar su tasqını saldarımen küresu jwmıstarın jalğastırıp jatır. Bwl turalı QR İşki ister ministrligi tötenşe jağdaylar komitetiniñ baspasöz qızmetinen habarlandı. 

"Üş kün qatarınan qar aralas jañbır jaudı. Qauipti aymaqtan halıqtı köşiru jwmıstarı uaqıtında boldı. Öskemen qalasında temperatura tömen, al Ürjar audanında aua temperaturasınıñ jılı boluı qardıñ birden erip ketuine äser eude", - delingen habarlamada.

Tarağan aqparatqa qarağanda 10 naurızdan beri jañbır jauuı saldarınan qar birden erigen, aua temperaturası + 10°C-den  -5°C aralığında özgerdi. 1 naurızdan 11 naurızğa deyin 53,2 mm jañbır jauıp, bwl bir ayda jauatın jañbır mölşerinen 2 esege köp bolıp otır.

"Eldi mekenderdi arıq kanaldarı bitelip qalğannan su basıp jatır. Keybir jerlerde mülde joq. Eldi mekenderden sudı bwru jergilikti atqaruşı organdardıñ qwzıretine jatadı", - delingen habarlamada.

Qazirgi kezde operativti ştab jwmıs istep jatqan körinedi. Qwtqaru jwmıstarına 1,032 adam, 286 birlik tehnika, 56 qayıq, 58 su sorğış qwral jwmıldırılğan. Äzirge oblısta 70 üy men 110 bau-baqşanı su basqanı, onda su soru jwmıstarı jürgizilgeni belgili.

Su basqan üylerden 400-ge juıq adam şığarılıp, olar Ayagöz qalasındağı №6 mektep-internatqa ornalasqan, qalğanı tuıstarınıñ üyinde.

“The Qazaq Times”