Türkimenstan prezidenti Qwrbanğwlı Berdimwhamedov Astana qalasında ötetin Ortalıq Aziya elderi basşılarınıñ sammitine qatısudan bas tarttı.

Osıdan biraz uaqıt bwrın BAQ ökilderi 22 naurız küni Astana qalasında Ortalıq Aziya elderi basşılarınıñ sammiti ötetindigin jarısa jazğan. Biri Qazaqstan prezidenti Nwrswltan Nazarbaev pen Özbekstan basşısı Şavkat Mirzieev Ortalıq Aziyanıñ basın biriktirmek dese, endi biri Astana men Taşkenttiñ bwl qadamınan tük şıqpaydı degen. Arada eki ayğa jeter-jetpes uaqıt ötkende resmi Aşhabadtan «Qwrbanğwlı Berdimwhamedov Astanağa barmaydı, ol öziniñ ornına parlament spikeri Akdjan Nwrberdıyevtı jiberedi» - degen habar jetti. Onıñ ne sebepti bwnday şeşim qabıldağanı äzirge belgisiz. Biraq sayasattanuşı Dosım Sätpaev bwl jayında bılay deydi: «Berdimwhamedovtıñ sammitke qatıspauınan eşnärse özgermeydi. Täjikstan aymaqtı jaqındastıratın oyınşı emes. Aşhabadtan däl osı jağdayda qanday da bir belsendilik nemese wsınıs kütudiñ qajeti joq. Bwl jerde wsınıstı Qazaqstan men Özbekstan jasaydı. Euroodaqtaqtı mısalğa alatın bolsaq, ol jerde qozğauşı küş Franciya men Germaniya. Basqalarınıñ belsendiligi tömen. Eger Astana men Taşkent aymaqtıñ qozğauşı küşi bola alasa, onda özge sayasi oyınşılar özdiginen keledi».

Türkimenstan prezidentiniñ Astanağa keluden bas tartuı asa bir ülken mäsele emes ekendigi aytpasa da tüsinikti. Onıñ üstine sammit formatınıñ özi de tek "aqıl-keñes" deñgeyinde ğana boladı dep kütilude. Aldın ala kelisim boyınşa aymaq basşıları bwl jolğı kezdesude tek oy almasu, pikir bölisuden arı aspaydı. Dese de bwl jolğı bas qosudıñ alar ornı erekşe. Sebebi Ortalıq Aziya elderi basşıları arağa 13 jıl salıp bes jaqtıq kezdesu ötkizbek.

Jalpı, Qwrbanğwlı Berdimwhamedovtıñ bwl şeşimi Türkimenstannıñ qay bağıtta ketip bara jatqanın añğartadı. Resmi Aşhabad aymaqtıñ bir böligi bolsa da, ol WQŞW, EAEO, ŞIW siyaqtı ekonomikalıq nemese integraciyalıq jobalardıñ eşqaysısına müşe emes. Bir sözben aytqanda Berdimwhamedov Özbekstannıñ bwrınğı prezidenti Islam Kärimovtıñ jabıq esik jağdayındağı sayasatın wstanıp otır.

“The Qazaq Times”