21 aqpan küni Almatı qalasındağı «Ğılım ordası» RMK-nda «Şığıs poeziyası: Abay – Nima, Mwqağali – Orhan Uäli» attı poeziya keşi ötti.

«Ğılım ordası» RMK Ortalıq ğılımi kitaphanası, QazWU Şığıstanu fakul'teti Türksoy ğılımi bilim beru jäne mädeni ortalığı jäne Iran eliniñ Almatıdağı Mädeni ortalığı qatarlı üş iri orınnıñ wyımdastıruımen ötken bwl igi şaranıñ mäni men mağınası zor, önersüyer qauımnıñ ruhani düniesine bereri mol boldı. Parsı, Türik, Qazaq halıqtarınıñ klassikteri sanalatın üş wlı twlğanıñ älem ädebietinde salıp ketken dara joldarı men şığarmaşılıqtağı sabaqtastıqtarı jönindegi oylarğa jeteleytin twñğış basqosudıñ körkin är universitetterden kelgen jalındı jastar qızdırdı. Atap aytar bolsaq, äl-Farabi atındağı QazWU şığıstanu fakul'teti, QazMQPU, Abılay han atındağı älem tilderi jäne halıqaralıq qatınastar universiteti, Abay atındağı QazWPU, Almatı universiteti qatarlı bilim oşaqtarınıñ jäne osı igi şaranı ötkizip otırğan Ortalıq ğılımi kitaphananıñ qızmetkerleri biregey twlğalardıñ öleñderin qazaq, parsı, türik tilderinde jatqa oqıp, körermenderdiñ köñilinen şıqtı. Äsirese, kölemdi zalda otırar orın qalmay, öleñ dese eleñdegen jastardıñ iin tirese türegep twrıp, ıstıq ıqılaspen kerim keştiñ kuäsi bolğanına bir kisidey tänti boldıq.

Öz kezeginde aqındar jazğan keremet änderge de orın berildi. Üş el arasında alğaşqı bolıp ötip jatqan kemeldi basqosudıñ ättegen-ay twstarı da joq emes. Älem tanığan Abaydıñ asıl sözderin jatqa aytu barısında jastardıñ jañılıp qaluı, Mwqağalida müdirui bizdi az qınjılttı. Degenmen, mädeni sabaqtastığınıñ tamırı tereñde jatqan ejelden jaqın elder arasında bolğan aytulı keş aldağı uaqıttarda tağı da jalğasın tabatının estip, quanıp qaldıq. Nege deseñiz, wlı Abay bastağan danalarımız susındağan şığıs klassikteriniñ marjan sözderi qazaq wltına jat dünie emes. Al, Twmar patşanıñ twsınan beri birde tatu, birde qatu bolğan körşilerimiz üşin de qazaq örkenieti qaşıqtağı beytanıs mwra sanalması anıq. Endi Türkiya men Qazaqstan arasındağı tuıstıq jönindegi äñgime aytpasaq ta tüsinikti. Demek, adamzattıñ ruhani älemi, ädebieti, sondağı poeziya janrınıñ jan tamırı qaşan da tomağa twyıq küyde bolmay, bir-birmen sabaqtas, izdes, iliktes keletini ämbege ayan aqiqat.

Qazaq ğılımınıñ qara şañırağında ötken bwl jır keşinen biz de osı bir silastıqtıñ lebin añğarğandaymız. Keş soñında wyımdastıruşılar sahna törinde älqissanı Abaydıñ «Segiz ayağımen» bastap, arada Nima men Orhandı oqıp, Mwqağali mwrasımen tüyindegen studentterge diplom tabıstıdı.

Ädilet Ahmetwlı

“The Qazaq Times”