Foto: thestar.com

Soñğı uaqıttarı älemdik bwqaralıq aqparat qwraldarı Süriya aumağında soğısıp jürgen Reseydiñ jaldamalı äskerleri jöninde jii ayta bastadı. Jalpı, reseylik «Vagner» jeke äskeri kompaniyasınıñ şığu tarihı qanday? Onıñ resmi Kreml'ge qanday qatısı bar? 

«Vagner» jeke kompaniyası Resey Qarulı küşterine bağınbaytın, eşqanday zañdıq negizi joq äskeri wyım. Germaniyanıñ «Bild» gazetiniñ mälimeti boyınşa, onıñ qwramında 2500 jaldamalı sarbaz bar. «Vagner» kompaniyası öz bastauın Süriya jerinen aladı. Bastapqıda «vagnerlikter» 2013 jılı Süriya aumağında «Slavyan korpusı» degen atpen türli äskeri operaciyalardı orındauğa qatısqan. Keyinnen «Slavyan korpusı» äskeri jasağınıñ müşesi Dmitriy Utkin «Vagner» jeke äskeri kompaniyasın qwrğan. Dmitriy Valer'eviç Utkin 1970 jılı düniege kelgen. Ol öz kezinde Resey Qorğanıs Ministrligine qarastı GRU arnayı jasağında bölim komandiri qızmetin atqarğan.

Dmitriy Utkin qwrğan «Vagner» kompaniyasına batıs basılımdarı 2014 jılı Ukraina Qauipsizdik qızmetiniñ basşısı Vasiliy Gricaktıñ: «Reseydiñ «Vagner» jaldamalı jasağınıñ IL-76 wşağınıñ qwlauına jäne Doneck äuejayı men Debal'cevo tübindegi soğısqa qatısı bar» - degen mälimdemesinen keyin nazar audara bastağan. Biraq «Vagner» kompaniyası özi jöninde jii aytıla bastağanan keyin Ukrainadağı belsendiligin tömendetip, biraz uaqıtqa üzilis alğan. Alayda köp wzamay 2015 jıldıñ ortasında «Vagner» sabrazdarı Süriya aumağındağı belsendiligin arttırğan. Olar 2015 jıldan beri Süriya aumağındağı türli äskeri operaciyalarğa qatısıp,  Pal'mirge şabuıl jasaudan bastap, mwnay ken orındarın basıp aluğa deyingi aralıqtağı äskeri operaciyalardıñ barlığına aralasqan. Biraq bir qızığı osınıñ barlığına qaramastan resmi Mäskeu: «Resey aumağında «Vagner» attı jeke äskeri kompaniya joq. Süriya men Ukraina aumağında soğısıp jürgen jaldamalı sarbazdar qayda barıp soğıssa da özderi biledi. Olarğa Resey Federaciyasınıñ biligi tıyım sala almaydı» - dep mälimdegen.

Ukraina Qauipsizdik qızmetiniñ mälimetinşe, «Vagner» jasaqtarınıñ qatarında reseylikterden bölek, ukrainalıqtar da bar. 2017 jıldıñ qazan ayında Süriya aumağında Ukraina tölqwjatı bar 40-qa juıq jaldamalı sarbazdıñ bar ekendigi jäne olardıñ är qaysısı ayına 160-240 mıñ rubl' tabıs tabatındığı anıqtalğan. Reseydiñ Süriyadağı äskeri operaciyalarına saraptama jasaytın «Conflict Intelligence Team» tobınıñ jetekşisi Ruslan Levievtıñ sözinşe, «Vagner» jaldamalı sarbazdarı äskeri operaciyalarğa qatısqanı üşin ayına 160 mıñnan 300 mıñ rubl'ge deyin jalaqı aladı. Olardıñ aylıq tabısı äskeri operaciyalardıñ orındalu barısı men qiındığına qaray tölenedi. Reseylik «Fontanka» basılımınıñ habarlauınşa, «Vagner» jeke äskeri kompaniyasın Resey Qorğanıs ministrliginen bölek, Vladimir Putinnıñ jaqındarınıñ biri, tanımal käsipker Evgeniy Prigojin qarjılandıradı. Biraq Prigojinnıñ özi BAQ ökilderine «Vagner» kompaniyasına qatısım joq» - dep mälimdegen. Alayda RBK arnası Evgeniy Prigojinnıñ «Vagner» kompaniyası jariyalağan birneşe tenderge qatısqanın anıqtağan. Bwdan bölek Prigojinğa tiesili delingen «Euro Polis» kompaniyası 2016-2017 jıldardı Süriya aumağındağı mwnay jäne gaz ken orındarın igeretinin mälimdegen. Al 2017 jıldıñ jazında «Euro Polis» Süriyanıñ memlekettik koncernimen «Islam memleketi» terrorlıq wyımı ieliginen keri qaytarılğan ken orındarımen igeruge baylanıstı kelisimge qol qoyğan. Al «Euro Polis» igeretin ken orındarınıñ qauipsizdigin «Vagner» kompaniyasınıñ sarbazdarı qamtamasız etetin bolğan.

“The Qazaq Times”