Resey SİM-niñ mälimetine qarağanda, Mäskeu tarabı Qırğızstan men Täjikstandağı äskeri bazaların nığaytuda. Onıñ sebebin Auğanstandağı terrorlıq toptardıñ küşeyuine baylanıstı dep tüsindirgen. Bwl turalı «Şinlañ» aqparattıq saytı jazdı.

Habarğa qarağanda bwl turalı mälimdemeni Resey SİM-niñ TMD elderi jönindegi keñestiñ törağası Aleksandr Sternik mälimdegen. Ol sözinde: «Qazir Resey jaq TMD elderiniñ şekaralıq qauipsizdigin nığaytudı qolğa aldı. Äsirese Resey men Orta Aziya elderiniñ oñtüstigindegi Auğanstan jağdayına basa nazar audarıp otır. Süriya men Iraktan jeñilis tapqan DAIŞ küşteri qazir Auğanstan jerine toptasuda. Dese de, olar Resey küşteriniñ nazarında», – dedi. Ol jäne Resey özine seriktes elderdiñ qauipsizdik küşterin jattığudan ötkizip, mañızdı şekaraların qorğauğa kömektesip otırğanın aytadı.

Aleksandr Sterniktiñ aytuınşa atalğan maqsattarğa jetu üşin Reseydiñ Täjikstandağı №201 äskeri bazasınıñ jañartılıp jatır. Oğan qosa Qırğızstandağı äue bazasın da nığaytıp, qauipsizdik talaptarına say etilmek eken.

“The Qazaq Times”