Donal'd Tramp Amerikanıñ Ierusalimdi Izrail'diñ astanası dep jariyalauına qarsı bolğan memleketterdi "AQŞ-tıñ jauları" dep atadı. Ötken jıldıñ 6 jeltoqsanında qabıldanğan şeşimdi BWW-nıñ Bas Assambleyası zañdı küşi joq dep tanıdı. AQŞ Prezidentiniñ mälimdemesine negiz bolğan memleketterdiñ sanı, şamamen - 128. Öytkeni AQŞ-tıñ Izrail'-Palestina mäselesindegi şeşimin ayıptaytın rezolyuciyanı 128 memleket qoldap, 7 el qarsılıq bildirgen. Al 35 müşe memleket dauıs beruden qalıs qalğan. Bwl turalı Äl-Jazira aqparattıq agenttigi jazdı. 

Donal'd Tramp öz sözinde: "Birqatar memleketter BWW-nıñ Bas Assambleyasında AQŞ-tıñ Ierusalimdi Izrail'diñ astanası dep tanu qwqığına qarsı dauıs berdi. Amerikanıñ salıq töleuşileriniñ qarjısınan jıl sayın bwl memleketterge şeteldik kömek esebinde milliardtağan dollar qarjı jiberiledi. Men bügin Kongresske Amerikanıñ sırtqa ketetin qarjısı memleketimizdiñ müddesine ğana qızmet etip, AQŞ-tıñ dostarına bağıttalğanın qadağalaudı tapsıramın", - dedi.

AQŞ osığan deyin öz jaularınıñ qatarın "terrorizmdi qoldağan", "yadrolıq qarudan bas tartpağan" memlekettermen ğana şektep, ol tizimge Soltüstik Koreya, Iran, Sudan men Siriyanı kirgizgen edi.

Äl-Jazirağa pikir bildirgen Memlekettik departament ökili BWW qabıldağan rezolyuciyanıñ Izrail' men Palestina arasında qalıptasqan daudı şeşuge eşqanday üles qospaytının aytqan. AQŞ-tıñ şeşimine qarsı şıqqan memleketterdiñ qatarında Wlıbritaniya, Euroodaqtıñ basım böligi, Irak pen Auğanstan da bar.

 “The Qazaq Times”