Katar patşa äuletiniñ müşesi şeyh Abdullah bin Äli Äl-Tani öziniñ birneşe ay boyı erkinen tıs BAÄ-da wstalıp, qısımğa wşırağanın habarladı. Ol sonday-aq Parsı şığanağındağı diplomatiyalıq dağdarıs Saud Arabiyası men BAÄ-nıñ Katardıñ baylığın iemdenu üşin wyımdastırğan amal-äreketi dep jariyaladı. Katarlıqtarğa memlekettiligin saqtap qaluğa mwqiyat bolu turalı eskertu jasağan Äl-Tani Äl-Jazirağa bergen audiohabarlamasında eşkimge ziyan keltirmes üşin, öz ömirine qol salatının jetkizgen. 

Şeyh Abdullah bin Äli Äl-Tani Saud Arabiyası men BAÄ tarapınan Katardıñ qazirgi bileuşisiniñ ornına wsınılıp kelgen kandidat bolatın. Bes Arab memleketi Katardıñ äue, qwrlıq jäne teñiz joldarın jauıp, "terrorizmdi qoldadı" degen ayıppen diplomatiyalıq blokada ornatqan mausım ayınan keyin, ol Saud Arabiyası men BAÄ telearnalarında Dohağa qarsı engizilgen şaralardı jaqtap, pikir aytıp jürdi. Blokadadan keyin osı eki memlekette twrğan Katar patşa äuletiniñ müşesi 14 qañtar küni öziniñ küşpen wstalıp otırğanın jäne ömirine qanday da bir qauip tönse, BAÄ ämiri kinäli bolatının habarlap, arnayı beynejazba jariyaladı.

15 qañtar küni Äl-Jazira alğan audiojazbada şeyh Abdullah bin Äli Äl-Tani öziniñ otbasınan qol üzip, eline orala almauına BAÄ ämirin kinälap, Parsı şığanağındağı dağdarıs Katardıñ baylığın qolğa tüsiru üşin ädeyi wyımdastırılğanın aytqan. Saud Arabiyası men BAÄ ämirleriniñ Katarğa qatıstı müddesin jariya etken audiojazbada ol öz eliniñ azamattarı men qazirgi bileuşilerin joğarıda atalğan memleketter wsınğan qarajat pen altınğa aldanıp, öz Otanın öz qoldarımen qwrdımğa jiberip almauğa keñes beredi.

Katar universitetiniñ professorı Madjed äl-Ansari şeyh Äl-Tanidiñ atalğan memleketterdiñ basşılarına jaqın jürgendikten, olardıñ josparına qanıq boluı äbden mümkin dep esepteydi. "Katar dağdarısı bastalğan uaqıtta belsendi bolğan Äl-Tanidiñ keyinnen közden tasa bolıp ketui, onıñ atalğan memlekettermen äriptestigi toqtap, qısımğa wşırağanın körsetedi" ,- dedi ol. Osı twsta atalğan memleketter Katar patşa äuletiniñ müşesin erkinen tıs wstap otırğanın joqqa şığarğanın atap ötu kerek.

Särsenbi küni şeyh Abdullah bin Äli Äl-Tani Kuveytke jetkizilip, birden auruhanağa jatqızıldı. Onıñ ağası Äl-Jazirağa bergen swhbatında bauırınıñ densaulığı Arab memleketi basşılarınıñ qısımınan kürt naşarlağanın jetkizdi. Soñğı derekterge säykes, onıñ jağdayı birqalıptı jäne jaqın künderi auruhanadan şığarıluı mümkin.

“The Qazaq Times”