Livannıñ taulı öñirinde Süriyanıñ şekarasın asıp, qarlı borannan qaza tapqan 9 süriyalıq bosqınnıñ denesi tabıldı. Olar Süriya men Livannıñ eñ ülken şekaralıq beketi  Masnağa jaqın aumaqtağı taulardıñ birinde jwma küni bolğan borannıñ astında qalğan. Livan äskeri qwrban bolğan azamattardan bölek, tağı 6 adamdı tauıp, auruhanağa jetkizgenin habarladı. Bwl turalı Äl-Jazira aqparattıq agenttigi jazdı. 

Livan äskeri qızmetiniñ habarlauınşa, qaza tapqan azamattardıñ tegi äli anıqtalmağan, biraq olardıñ qatarında kemi bir bala bar ekeni belgili boldı. Qazir arnayı qwtqaru jasağı taulı öñirdegi özge süriyalıq bosqındardı izdestirip jatır. Olardı uaqıtılı tauıp, medicinalıq kömek körsetu tağı birneşe azamattıñ ömirin saqtap qaluğa mümkindik beredi.

Äl-Jazira aqparattıq agenttigi tilşisiniñ habarlauınşa, qıs mezgili - süriyalıq bosqındardıñ tirşiligi qiındaytın kez. Soñğı künderi aua temperaturasınıñ kürt tömendeuine baylanıstı, Masnadan soltüstikke qaray  60 km jerdegi jazıqta uaqıtşa şatırlarda twrıp jatqan 357 mıñ bosqınnıñ jağdayı auırlay tüsken. Atalğan aumaqta bolğan tilşi bosqındardıñ şatırı suıq pen jañbırdan qorğauğa qabıletsiz plastikalıq jabındılardan jasalğanın aytadı. Resmi derek boyınşa, Livanda 1 mln süriyalıq bosqın tirkelgen. Al beyresmi olardıñ sanı 1,5 millionğa juıqtaydı. BWW-nıñ bosqındar isi jönindegi agenttik Livanda twraqtağan süriyalıq azamattarğa kömek körsetu üşin tiisti qarajatqa qol jetkize almay otırğanın jetkizdi. Agenttikke ötken jılı swralğan 228 mln AQŞ dolları kölemindegi qarjınıñ tek 60 payızı ğana berilgen.

“The Qazaq Times”