Qazaqstan Respublikasınıñ Memlekettik qızmet isteri jäne sıbaylas jemqorlıqqa qarsı is-qimıl agenttigi törağasınıñ orınbasarı Aygül Şayımova agenttik qızmetkerleriniñ qanşa jalaqı alatını turalı ayttı.

"Qazirgi uaqıtta bizde 158 mıñ teñge - eñ tömengi jalaqı, maksimum - 400 mıñ teñge şamasında", - dedi ol Astanadağı ortalıq kommunikaciyalar qızmetinde ötken brifingte.

Onıñ sözinşe, agenttik memlekettik qızmetkerlerdiñ jalaqısın töleu üşin jaña tölem jüyesin engizu jönindegi pilottıq jobağa qatısatın boladı. Jaña joba boyınşa öñirler men ortalıqta jwmıs isteytin memlekettik qızmetkerlerdiñ jalaqıları arasındağı ayırmaşılıq 10 payızğa deyin tömendep, ortaşa aylıq jalaqı eki ese artuı mümkin.

"Mısalı oblısta tömengi lauazımda jwmıs isteytinderdiñ jalaqısı 62 mıñ  teñgeden 117 mıñ teñgege deyin köteriledi. Bwl oblıs äkimdigindegi jetekşi mamandarğa qatıstı. Al ortalıqtağı jalaqı 84 mıñ teñgeden 136 mıñ teñgege deyin joğarılaydı", - dedi ol.

Bwdan bölek, jaña jüye boyınşa mereke künderi beriletin sıyaqını almastıratın bonus qorı qwrıladı. Bwl boyınşa jılına bir ret tört aylıq jalaqı kölemindegi bonus tölemderi engiziledi. Alayda bonustar tek tiimdi jwmıs istegen memqızmetkerlerge ğana beriledi.

“The Qazaq Times”