Keşe, 17 qañtar küni Almatıdağı M. Äuezov atındağı Qazaq memlekettik akademiyalıq drama teatrında, Qazaqstandağı teatrlardıñ atası, alğaşqı qwruşılarınıñ biri, rejisser, dramaturg Jwmat Şaninnıñ 125 jıldığına oray döñgelek üstel ötti. Talqı otırısınan keyin Ğ. Müsirepovtıñ «Qız Jibek» muzıkalıq draması körermenderge wsınıldı.

J. Şaninnıñ 125 jıldığına oray döñgelek üstelge qatısuşılar. Foto: QT.

Döñgelek üstelge respublikağa tanımal teatr akterleri, teatrtanuşılar, sınşılar, zertteuşiler jäne J. Şaninnıñ wrpaqtarı qatısıp, teatr alıbınıñ ömiri turalı qwndı derekterdi ortağa saldı. Sonımen birge J. Şaninnıñ qalamınan tuğan «Arqalıq batır» kitabı qaytalay basılıp, twsauın kesildi.

Jazuşı, ğalım Beybit Qoyşıbaev. Foto: QT.

Jwmat Şanin ömiri men ol ömir sürgen däuir turalı jazuşı, ğalım, publicist Beybit Qoyşıbaev: «Şındap kelgende, teatrdıñ alğaşqı qwrılğan kezdegi tağdırı da, J. Şaninnıñ tağdırı da tarihımızdağı eñ bir qiın kezderge tura keldi. Sol kezde eseñgiregen halıqtıñ eñsesin köteruge teatrdıñ röli zor boldı, oğan qızmet etken osı Jwmat Şanin qatarlı erlerdiñ de eñbegi zor. Sol kezde Temirbek Jürgenov bastap mädeniettiñ ülken bir revolyuciyasın jürgizip otırdı. Sonday kezde jartısı qırılıp qalğan halıqtıñ şaşırap ketken önerpazdarın jinap, muzıka teatrın wyımdastırıp, el eñsesin tiktegen osı Jwmat Şanin bolatın. Tipti Reseydiñ qwramındağı Qazaq avtonomiyalı respublikasınıñ Odaqtas respublika retinde tanıluına da osı teatrdıñ eñbegi zor boldı. Sebebi ol kezde wlttıq ekonomikası küyregen, halqınıñ sanı azayğan elimizdi teñ, Odaqtas respublika dep tanıtatın bir ğana osı mädeniet salası twrıp edi», – degen pikirin ortağa saldı.

"Bekejan" "Qız Jibek" muzıkalıq dramasınıñ körermeni boldı. Foto: QT.

Teatr atası, qazaq teatr öneriniñ, dramaturgiyasınıñ alıbın eske alu jiınında A. Äşimov, E. Obaev, Ä. Böpejanova, Z. Asabaev, Ä. Köpiş qatarlı, öner men ädebiet qayratkerleri jäne J. Şanina, Qayrat Şanin qatarlı J. Şanin atanıñ izin jalğastıruşı wrpaqtarı söz tizginin wstadı.

Elik Nwrswltan sahnalağan "Qız Jibek". Foto: QT.

Döñgelek üstelden keyin, J. Şaninnıñ şöberesi Elik Nwrswltannıñ sahnalauımen  Ğ. Müsirepovtıñ «Qız Jibek» muzıkalıq draması körermenderge wsınıldı.

“The Qazaq Times”