Wlıbritaniyanıñ zañ şığaruşıları kofege arnalğan  bir ret qoldanılatın ıdıstar üşin "lattege arnalğan salıq" türin engizudi wsınıp otır. YAğni iri qalalardağı qoqıs mölşerin azaytu maqsatında atalğan ıdıs türine 25 pens (şamamen 100 teñge) artıq tölenui mümkin. Al aldağı 5 jıl işinde bwl ıdıs türlerine mülde tıyım salu wsınıldı.

Ekologiyalıq audit jönindegi parlament komitetiniñ bayandamasında aytılğanday, jıl sayın britandıqtar kofe işu kezinde 2,5 milliardtan asa bir rettik kofe ıdısın qoqısqa tastaydı eken. Bwl şamamen 30 mıñ tonnanı qwraydı. Al onıñ tek 0,25 payızı ğana qayta öñdeledi. Sebebi kofe ıdıstarı qattı karton men polietilen qospasınan jasalğandıqtan onı bir birinen bölip alu qiın. Sondıqtan bwl ıdıs türleri qağaz nemese cellyuloza kombinattarında qayta öñdep şığuğa qabıldanbaydı eken.

Komitettiñ mälimetinşe, jaña salıqtan tüsken qarjını bir rettik staqandardı jäne osığan wqsas qoqıs türlerin qayta öñdeytin arnayı käsiporın aşuğa jwmsauğa boladı. Sonday-aq, komitet kofe satatın orındardı utilizaciya üşin artıq töleuge jäne ortağa keltirip otırğan ziyandar turalı twtınuşılarğa aqparat beretin jazbalardı köbeytuge mindetteudi wsınıp otır. The Guardian aqparat agenttiginiñ mälimetinşe, qazirgi kezde keybir kofe satatın orındar özderiniñ staqanımen nemese şınıayağımen kelgen klientterge jeñildikter jasaudı qolğa alğan, biraq mwnıñ özi tek 1-2 payızdı ğana qwraydı.

Bwdan bölek, jeltoqsan ayında ekologiyalıq audit jönindegi komitet Wlıbritaniya ükimetine qaldıqtardıñ mölşerin azaytu üşin plastikalıq bötelkelerge depozittik tölemder jüyesin engizuge keñes bergen.

“The Qazaq Times”