Jeltoqsan ayınıñ 17-si men 19-ı aralığında Almatı oblısınıñ Talğar audanındağı «Almaty Horse and Polo Club»  at sportı keşeninde şögennen Qazaqstan Respublikasınıñ Täuelsizdik künine oray wyımdastırılğan turnir bolıp ötti.

Turnirge «Äulieata» şögen klubı, «Astana Polo Club»,  «Almaty Polo Club», «Almaty Horse & Polo Club» jäne «Tu’lpar Polo Club»  komandaları qatıstı. Üş künge sozılğan tartıstı oyında «Almaty Polo Club» komandası birinşi orın, «Astana Polo Club» qwraması ekinşi orın, «Äulieata» şögen klubı üşinşi orın aldı. Üşinşi orın üşin ötken oyında  «Äulieata» şögen klubı «Almaty horse & Polo Club» komandasımen kezdesip, 6:1 esebimen jeñiske jetti. Osı oyında qarsılasınıñ qaqpasına 3 gol soqqan «Äulieata» komandasınıñ kapitanı Nwrdäulet Momınov oyınnan keyin turnir jayında pikir bildirdi. Ol onda: «Bügin öte jaqsı oyın boldı. Astana men Almatı qalalarınıñ komandaları halıqaralıq turnirlerdiñ jeñimpazdarı ekendigi belgili. Biz bügin olarğa layıqtı qarsılas bolğanımızğa quanıp twrmız. Jalpı, kökpardan keyin şögen oynau asa bir qiındıq tuğızbaydı. Aldağı turnirlerde birinşi orın aluğa tırısımız» - dedi.

Al birinşi orın üşin bolğan oyında «Almaty Polo Club» komandası «Astana Polo Club» qwramasın 3:2 esebimen jeñdi. Ayta ketetin bir jayt, bwğan deyin däl osı eki komanda tamız ayında ötken Qazaqstan çempionatında finalda kezdesken bolatın. Ol kezde astanalıqtar alañ ielerin 6:4 esebimen tize büktirip, Qazaqstan Respublikasınıñ 2017 jılğı çempiondarı atanğan.

Qazaqstan şögen federaciyası 2012 jılı qwrılğan. Sol uaqıttan bastap qazaq şögenşileri türli halıqaralıq turnirlerdiñ jeñimpazdarı atanıp ülgergen. Al 2014 jılı Qazaqstan Halıqaralıq şögen federaciyasına müşelikke qabıldanğan.

“The Qazaq Times”