Bügin Almatı halqı akter, qazaqtıñ Tölegeni Qwman Tastanbekovtı aqtıq saparğa şığarıp saldı. Aktermen qoştasu räsimi Almatı qalasındağı M. Äuezov atındağı Qazaq memlekettik akademiyalıq drama teatrında ötti. 

Aktermen qoştasu räsimine Qazaqstannıñ Halıq ärtisi Asanäli Äşimov, Almatı qalasınıñ äkimi Bauırjan Baybek, QR Mädeniet jäne sport ministri Arıstanbek Mwhamediwlı jäne Mañğıstau oblısı men Batıs Qazaqstan oblısı äkimderiniñ orınbasarları qatısıp, Qwman Tastanbekovtıñ otbasına köñil ayttı.

"Dosım, inim, bauırım, äriptes partnerim, süyenişim o dünielik degende "Apır-ay, aldında Amerikada, Londonda on kün, bir apta boldıq. Qasımda jürip edi. Sonda nege bir qwşaqtap süymedim" dep ökinip jatırmın. Kirşiksiz taza jigit ekenin eldiñ bäri biledi. Jaqsı adamnan ğana jaqsı akter şığadı.  Qwmannıñ janı kirşiksiz taza edi. Külip qana twratın akter, jaydarman jigit ortamızdan ketti. Änuar Moldabekov üşeumizdiñ dostığımız "Qız Jibekten" bastalğan... Ol kezde Meruert onınşını endi ayaqtağan, 17-18 jasta. Bizder otızdamız. Qız Jibekke qatısqan bükil sostavtan  üşeumiz ğana qalıp edik. Bwl tarih. Qwman ölmeydi degen söz. Onıñ isi ölmeydi", - dep köñil ayttı Asanäli Äşimov.

Foto: QT

"Ağamızdıñ sanalı ğwmırı 1945 jılı Almatı oblısında düniege kelgennen osı Almatı qalasınıñ sahnasında jalğastı. Bügin ärbir qazaq üşin qaralı kün. Ornı tolmas qaza. Ağamızdı elimizde bilmeytin qazaq joq şığar... Sondıqtan Almatı jwrtşılığınıñ atınan sizderge köñil aytamın", - dedi Almatı äkimi Bauırjan Baybek.

QR Mädeniet jäne sport ministri Arıstanbek Mwhamediwlı Prezident Nwrswltan Nazarbaevtıñ köñil aytu jedel hatın Qwman Tastanbekovtıñ otbasına tabıstadı.

Foto: QT

Qwman Tastanbekov 1945 jılı Almatı oblısı, Sarqant audanı, Ekiaşa auılında düniege kelgen. Ol qazaq halqına Swltan Qojıqovtıñ 1970 jılı jarıq körgen «Qız Jibek» fil'mi arqılı tanıldı. Sodan beri ol "Aqqular wşıp keledi",  "Provinciyalıq hikaya", "Ağama arnalğan qalıñdıq", "Ağam meniñ", "Köşpendiler", "Mahambet", "Mahabbat jañğırığı" sındı fil'mderge tüsken.

Ol 1993 jılı Qazaqstan Respublikasınıñ halıq ärtisi atanıp, 2008 jılı "Qwrmet" ordeni, 2015 jılı "QR konstitutciyasına - 20 jıl" merekelik medali jäne 2016 jılı "Parasat" ordenimen marapattaldı.

Qwman Tastanbekov 17 jeltoqsan küni 72 jasında dünieden ötti.

“The Qazaq Times”