Mwstafa Öztürik — şığıs jekpe-jek önerin jetik meñgergen jay ğana sportşı emes. Ol twmandı, qarabarqın älemge jiberilgen jarıq jwldız sekildi edi. Ol şie böriler men qandender, tülkiden azğan qarsaqtar qaptağan dalağa nağız kökböri ruhın alıp jetken kökjal bolatın.

Onıñ ataları ädiletsizdik pen qorlauğa tözbegen, ör namısı men asqaq keudesin jaularına bastırğısı kelmegen nağız dala qırandarı bolatın. Eselesken dwşpanğa bas imeytin, qoyday qayırıp, qorağa kürgeyleuge könbeytin tüz tarpañdarı erlik tuın jıqqan joq. Jaularımen atıstı da şabıstı, biraq alğan betinen qaytpadı. Alıp şöl Taklamakandı basıp, aspanmen tildesken Gimalaydı asıp, aqırı Anadolığa jetti. Sol batır eldiñ, qaysar qazaqtıñ taza qandı wldarınıñ biri Mwstafa Kabeywlı Öztürik bolatın.

Şoqtay janğan janarınan kökböriniñ ruhı laulap, aynaday jan-düniesi jarqırap twratın. Batırğa bitken mısı, asılğa bitken minezi Täñir erekşe jaratqan bolmısı nağız noyan edi.
Elim, jerim, wltım, qazağım degen sözdi ol jan-tänimen berilip ayttı. Qazağım degen wldıñ jüregi appaq, nieti kirşiksiz taza edi, biraq onı qasköyler qızıl qanğa boyadı. Tazqaralar men qwzğındar jaylağan aspanda, biikke qanat qaqqan qırannıñ topşısın qiıp, omırtqasın üzdi. Tübi Mwstafaday erge jasalğan qastandıq, ayausız qasköyliktiñ artı aşılmay qoymas. Öytkeni, qan qarızı, halqı süygen beyuaz wldıñ obalı eşkimdi jibere qoymas.

Qazaqtıñ qaysar wlı.

Oğan degen el-jwrttıñ peyili qanday edi. Halıq şın ıqılas-nietimen, mahabbatımen biikke kötergen Mwstafa täuelsizdikti jaña alıp, qwldıqtın qwrsauınan endi bosağan eldiñ eñsesin köteruge, ruhın örletip, namıs tuın jelbiretuge kelgen jebeuşi, sananı bwğaulağan temir şınjırdı turauğa jibergen Täñirdiñ aldaspan qılışınday edi. Iä, onımen kezdesken, tälimin alıp, önerin üyrengen, sözin tıñdap, jüzin körgen jannıñ bäri sonı añğardı, sezindi. Sol sezim äli de halıqtıñ jüreginde. Tiri bolsa Alaştıñ aytöbel batırı alpısqa tolar edi… Amal ne?! Onıñ ruhı darığan, qasieti qonğan wldarımız aman bolsın!

Aytpaqşı, äygili äkter, jekpe-jek öneriniñ şeberi Bryus Lidiñ kinosın köp körgender Mwstafa Öztüriktey düldül wldı «qazaqtıñ Bryus Lii» deydi eken. Özimizdi özgelerdiñ şeginen asıra almaytın mojantopaylıqtan basqa tük te emes bwl. Iä, Bryus Li de aytulı twlğa. Biraq, ärtis sportşını Mwstafaday batırmen, bolmısı dara, qıran minez, kökjal ruhtı nağız Köktüriktiñ wrpağımen teñestiru tım tayızdıq bolar edi. Birge öner üyrengen, qasında bolğan Bryus Lidiñ qatardağı adam ekenin Mwstafa batırdıñ özi de aytıp ketken. Kemsitu de, köre almau da, tömen sanau da emes, şınayı pikir, qalıptı közqaras.
Sondıqtan, Mwstafa Öztürik qazaqtıñ Bryus Lii emes, ol – qazaqtıñ Mwstafa Öztürigi, wltınıñ oğlanı, eliniñ nağız eñirep tuğan Eri. Jatqan jeriñ jaylı bolıp, ruhıñ aspanda şalqısın, asıl ağa!

“The Qazaq Times”

(Maqala 2014 jılı qiyan.kz. bnews.kz sayttarında jariyalanğan. Bügingi Dimaştıñ özin Vitasqa teñegenderge aytqan jauabına oray, ündes taqırıptı oqırman nazarına qayta wsındıq-redakciya)