Qarağandı oblısındağı "ArselorMittal Temirtau" şahtalarındağı 150-den asa kenşi jer betine köterildi. Bwl turalı oblıs äkimdiginiñ baspasöz qızmeti habarladı. 

Tarağan mälimetterge sensek, 13 jeltoqsan küni 00.30-da Erlan Qoşanov Şahtinsk şahtasınıñ kenjarına tüsip, eki sağattıq kelissözden keyin jer betine 59 adam köterilgen. Tentek şahtasında kezdesuden soñ 76 adam jer betine şıqqan.

Tentek şahtasında Erlan Qoşanov «ArselorMittal Temirtau» AQ şahtaları direktorlarınıñ, käsipodaqtar jäne brigadirlerdiñ qatısuımen jinalıs ötkizdi. Mwnda tağı bir märte kenşilerdiñ talaptarı men kompaniyanıñ wsınıstarı talqılandı.

Qarağandı oblısınıñ äkimi Erlan Qoşanov Kenşilermen söylesken. Foto: karaganda-region.gov.kz

Odan keyin äkim Lenin şahtasına kelip, kenjarğa tüsip, kenşilermen kezdeskennen soñ 19 adam jer betine köterilgen.

Al 06.00 şamasında äkim Qazaqstan şahtasına tüsip, onda da kenşilermen kezdesken. Biraq kelissözder jalğasuda.

"13 jeltoqsan tañerteñgi sağat 8-ge deyingi uaqıtta  154 kenşi jer betine köterildi. Mwnımen qosa, äleumettik jelilerde Şahtinskide qamauğa alu jağdayları orın alğanı turalı mälimet tarağan. Bwl aqparatqa qatıstı Qarağandı oblısınıñ İşki ister departamentiniñ baspasöz-qızmeti Şahtinsk qalasında eşqanday twtqındau jäne qamau amaldarı jürgizilmegenin mälimdedi. Policiya qızmetkerleri azamattarğa jalpı dürbeleñge boy bermeulerin swraydı", - delingen baspasöz habarlamasında.

Ayta keteyik, keşe QR Eñbek jäne äleumettik damu ministri Tamara Düysenova  "jalaqımızdı 100 payızğa kötersin" degen talappan Qarağandı şahtalarınan şıqpay otırğan kenşilerdiñ sanı 684 adamğa jetkenin habarlağan bolatın. Kenşiler 11 jeltoqsannan beri jalaqını 100 payızğa köteru, auırğan uaqıttarğa 100 payız eñbekaqı beru, zeynetaqı jası mäseleleri boyınşa narazılıq tanıtıp jer astınan şıqpay otır jäne kün ötken sayın olardıñ sanı köbeygen.

“The Qazaq Times”