Qazaqstandağı Europalıq qayta qwru jäne damu banki «İsker arularğa arnalğan tälimgerlik»  bağdarlamasınıñ toğız aydağı nätijesin jariyaladı. Bağdarlamağa tälimgerler men şäkirtterdi qosa alğanda 28 jwp qatısqan. 

Osı jıldıñ aqpan ayınan qazan ayına deyin Qazaqstanda biznes jürgizu boyınşa jan-jaqtı täjiribesi bar tabıstı käsipkerler aymaqtarda biznesin jañadan jürgizip jatqan käsipker arularğa käsibi jäne jeke qwziretin
jetildiruge jäne isker baylanıstardı keñeytuge kömektesken.

Bağdarlamağa qatısuşılardıñ saualnaması boyınşa  tälimgerlerdiñ 87%-ı men  şäkirtterdiñ 89%-ı bağdarlama basında alğan qoyğan maqsattarına tolıqtay nemese jekeley qol jetkizgen.

Bağdarlama qatısqan tälimgerlerdiñ biri, biznes-trener Ğani Abadan biznes bastağan äyelderdiñ keminde onınıñ toğızı onı ayağına deyin jetkizetinin aytadı.

Biznes trener Ğani Abadan. Foto: QT

"Äyelderdiñ käsipkerligin qoldau trendke aynaldı. Er adamdar biznespen aynalısu turalı wzaq oylanbaydı, tez şeşim qabıldaydı. Olar üşin biznes bastauda qauip deñgeyi tömen. Sondıqtan bizge bir jobanı wsınğanda onı birden bastap kelemiz. Al äyelder wzaq oylanadı. Mısalı er adam bir biznesti bastasa bir jıldan keyin odan aynıp qaluı mümkin. Al äyelder bir biznesti bastasa, keminde onınıñ toğızı ayağına deyin jetkizedi. Osı sebepten men äyelder käsibine köñil bölinu kerek dep oylaymın", - deydi biznes-trener Ğani Abadan.

Al bağdarlamağa qatısuşı şäkirt «Azaya» tigin kompaniyasınıñ direktorı Aynwr Baqtığalieva jobağa qatısqannan keyin Aqtöbe qalasında jwmıssız jürgen äyelderge arnalağan oqu ortalığınıñ aşılğanın aytadı. Aynwr Baqtığalievağa täuelsiz sarapşı Janat Berdalina tälimger bolğan.

Jobağa qatısuşı şäkirt «Azaya» tigin kompaniyasınıñ direktorı Aynwr Baqtığalieva. Foto: QT

"Biz bwl jobağa qatıspay twrıp, kompaniya öziniñ belgili bir därejesine jetkendey körindi. Arı qaray "qalay damimız, ne isteymiz? Tağı bir jwmıs ornın aşqan soñ arı qaray önimdi bola ma?" degen swraq tuındadı. Öytkeni bizdiñ salada bäseke joğarı. Kiimder körşi elderden de kelip jatır. Osıdan keyin biz jobağa qatısu arqılı Janat Qolanqızınıñ wsınısımen oqu ortalığın aşudı jön kördik. Sodan osı jıldıñ qırküyek ayında oqu ortalığı aşıldı. Onda Aqtöbe qalasındağı jwmıssız  äyelderdi jinap, üş aylıq tegin kurstı oqıtıp jatırmız", - deydi Aynwr Qaysarqızı.

Jalpı EQDB-nıñ «Biznestegi arular» bağdarlaması 2015 jılı qaraşa ayında iske qosılğan. Bağdarlamanı Qazaqstan Respublikasınıñ ükimeti jäne EQDB qarjılandıradı. Qarjımen qosa EQDB şağın jäne
orta bizneske öndiristi jäne bäsekelestikti arttıruğa bağıttalğan zamanaui basqaru täjiribesin jäne tehnologiyasın engizuge nou-hau aluğa mümkindik beredi.

“The Qazaq Times”