Europa Odağı elderi Afrika men Orta Şığıstan kelgen 34 mıñ bosqındı qabıldauğa kelisim berdi. Bwl şeşim bir kün bwrın BWW-nıñ Europa elderiniñ Liviyadan kelgen qayıqtardı şekaradan ötkizbegen, adamgerşilik twrğısınan aqtalmaytın äreketteri üşin  sınğa wşırağannan keyin qabıldanıp otır. Odaqqa müşe 16 memleket Europa Komissiyasınıñ aldağı eki jıl işinde 50 mıñğa juıq bosqındı qabıldau  turalı bağdarlamasına säykes,  34 mıñ bosqındı bölip  alıp, öz elderinen baspana tauıp beruge kelisim berdi. 

Euroodaqtıñ bosqındar boyınşa komissarı Dmitris Avramopolus qabıldanğan şeşim şekaranı zañsız asatın migranttardıñ qauipti joldardı tañdap, teñizde ölu qaupin azaytarına senedi. 2015 jılı eñ alğaş bosqındar dağdarısı bastalğan uaqıttan beri arada eki jıl uaqıt ötse de, Jerorta teñizi tübine batıp ketetin qayıqtardıñ qayğılı oqiğası äli de jii kezdesedi. Europa komissarı Odaqqa müşe memleketterdiñ bwl mäseleni birigip şeşu turalı ortaq kelisimge kelgeni jağdaydıñ twraqtalğanın körsetetinin jetkizdi.

Sonday-aq ol, Pol'şa, Çehiya jäne Vengriyanı bosqındardı qabıldaudan tübegeyli bas tartu sayasatın qayta qarauğa şaqırdı. Olay bolmağan jağdayda Europa Komissiyası tiisti şaralar qabıldauğa mäjbür bolatının jetkizgen ökil Italiya men Greciyadağı bosqındardıñ bir böligin basqa orınğa qonıstandıru qajettiligin habarladı. Ekinşi Düniejüzilik soğıstan beri alğaş ret eñ ülken bosqındar ağının wşıratıp otırğan Europa elderi mäseleni şeşu üşin Liviyanıñ şekara qızmetimen Jerorta teñizi arqılı Europağa ötuge ıntalı migranttardı qolğa tüsiru turalı kelisimge kelgen bolatın. BWW Euroodaqtıñ bwl äreketin qatañ sınğa alıp, "Liviyada qolğa tüsken migranttardıñ qayğısı - adamzat balasınıñ arına jük" dep atadı.

“The Qazaq Times” |