Foto: BBC

Yemen Prezidenti Saud Arabiyasınan eline qaytsa, onıñ ömirine ülken qauip tönui mümkin. Osınday mälimdeme jasap, memleket basşısınıñ ömirine alañdauşılıq bildirgen Yemenniñ resmi ökili Prezident Äbd-Rabbu Manswr Hadidiñ Saud Arabiyasında üy qamağına alınğanı turalı aqparattı teriske şığardı. Bwl turalı Äl-Jazira aqparattıq agenttigi jazdı. 

"Ol (Yemenniñ Prezidenti) qalasa, kez kelgen elge bara aladı. Biraq qazir Hadidiñ Yemenge oraluı onıñ ömiri üşin asa qauipti", - degen resmi ökil qanday qarulı toptıñ Prezidentti öltirgisi keletinin naqtılağan joq. Juırda aqparat qwraldarı aqpan ayınan  beri Yemende töbe körsetpegen Manswr Hadi men onıñ otbasın Saud Arabiyası biligi üy qamağına alğan degen habar taratıp edi. Resmi ökil bwl bas bostandığınan ayıru şarası emestigin bılay tüsindirdi: "Hadi Yemenge oralu turalı oyın aytqan kezde, Saud Arabiyası qazir bwl sapar onıñ ömiri üşin qauipti bolatının aytıp, jağday twraqtalğanşa, Er-Riyadta qaludı ötingen".

Äbd-Rabbu Manswr Hadi 2012 jıldan beri Yemenniñ Prezidenti lauazımın atqarıp keledi. Ol özine deyingi Äli Abdulla Salehqa qarsı bir jılğa sozılğan köterilis nätijesinde 2 mıñğa juıq adam qaza tapqannan keyin, AQŞ-tıñ aralasuımen uaqıtşa saylanğan basşı bolğan. Biraq eki jıl merzimnen keyin ol kezekti saylaudı keyinge qaldıra berdi. Saleh twsında 18 jıl vice-ministr bolğan Manswr Hadi yemendikter arasında tanımaldığı tömen boldı. Qazir de Yemen azamattarınıñ  arasında qoldau tappağan Prezident turalı jergilikti twrğındardıñ pikirine säykes, halıqtıñ basım köpşiligi onıñ qayta oralmağanın qalaydı.

“The Qazaq Times”