Foto: Lavenir.net

Ötken aptada «Dispatch Weekly» gazeti «quğındağı bankir, oppoziciyalıq sayasatker Mwhtar Äbilyazov resmi Bryussel' biligimen kelisip Patoh Şodiev pen Älijan Ibragimovke qarsı kuägerlik etip Bel'giya azamattığın aluı mümkin» degen aqparat tarattı. Bwnıñ Franciya men Bel'giya sayasatkerlerine qanday qatısı bar? "Qazaqgeyt-2"  Bryussel' men Parij arasında qanday dau tuğızuda? Bügin biz osı jäne özge de swraqtarğa jauap izdep köruge tırıstıq. 

Qazirgi tañda Bel'giyada qazaqstandıq oligarhtar Patoh Şodiev pen Älijan Ibragimovtıñ üstinen «2011 jılı Bel'giya qwzırlı organdarına para wsındı» degen ayıp tağılğan qılmıstıq is qozğalıp jatqanı belgili. Osığan baylanıstı Bel'giya biligi atalmış iske baylanıstı tağı bir qazaqstandıq oligarh, quğındağı sayasatker Mwhtar Äbilyazovpen baylanıs ornatuda. Al resmi Bryussel'diñ ne üşin bwnday qadamdarğa barıp otırğandığın bilu üşin  bizge 1997 jılğa oraluımızğa tura keledi. Öytkeni däl osı jılı Patoh Şodiev Bel'giya azamattığın alğan. Däl osı uaqıtta Şodievtiñ "Tractebel isine qatısı bar" degen aqparat tarağan. Atalmış is bel'giyalıq «Tractebel» firması ne bäri 5 million dollarğa «Almatıenergo» jelilerin satıp alğannan keyin bastalğan. «Tractebel isine» baylanıstı sot procesi on jılğa sozılğan. Sot barısında Şodievtiñ «Tractebel» firmasına «Almatıenergomen» kelisim kezinde lobbistik qızmet jasağanı üşin para bergendigi anıqtalğan. Biraq osıdan keyin Bel'giyada para bergender sotpen kelisken jağdayda qılmıstıq jauapkerşilikten ayıppwl töleu arqılı qwtıla alatın zañ jobası qabıldandı. Şodiev Bel'giya biligi wsınğan bwl jeñildikti birden paydalanıp ketti. Ol zañ şığa salısımen birden 23 million euro ayıppwl tölep, qılmıstıq jauapkerşilikten qwtıldı.

Alayda «Qazaqgeyt-2» isi bwnımen ayaqtalğan joq. 2014 jılı Franciya BAQ ökilderi «Tractebel isine» qatısı bar franciyalıq jäne bel'giyalıq sayasatkerlerdiñ attarı atalğan qwjattardı jariyaladı. Al 2016 jılı Bel'giya parlamenti atalmış iske baylanıstı arnayı komissiya qwrdı. 2017 jıldıñ mamır ayında bel'giyalıq «Vif» jurnalı atalmış iske Franciyanıñ bwrınğı İşki ister ministri, Nikol'ya Sarkozi kezindegi prezident äkimşiliginiñ basşısı Klod Gean men Bel'giya Senatınıñ bwrınğı törağası, eks-qarjı ministri, qazirgi tañda Bel'giya sırtqı ister ministri qızmetin atqaruşı Did'e Reynderstiñ qatısı bar qwjattardı jariyaladı. Bwl qwjattardıñ jarıqqa şığuı Franciya men Bel'giya arasında ükimetaralıq sayasi dau tuğızdı. Resmi Bryussel' tarapı atalmış is arqılı Franciya biligi Bel'giya parlamentine ıqpalın jürgizui mümkin dep küdiktenedi. Al Franciya tarapı Bel'giyanıñ bwl küdigin negizsiz dep esepteydi.

Osılayşa resmi Bryussel' men Parij bir-birine küdikpen qarap otırğanda Europa sot zaldarında atı Şodiev pen Ibragimovtan kem atalmaytın Äbilazov «Qazaqgeyt-2» isine öz ülesin qosudı wyğarıptı. Ol resmi Bryussel'men kelisimge kelu arqılı Bel'giya azamattığın alıp, Qazaqstan, Resey nemese Ukrainağa ekstradiciyalanbaudıñ jolın qarastıruda. Onıñ bwnday qadamdarğa baruına sebep te joq emes. Öytkeni soñğı uaqıttarı Franciya prezidenti Emmanuel' Makron Reseymen jaqsı qarım-qatınas ornatuda. Al bwl degenimiz aldağı uaqıtta Franciyadağı sayasi ahual Äbilyazovtıñ paydasına jwmıs istemey qaluı mümkin degen söz. Bir sözben aytqanda qazaq oligarhtarı jayındağı «Qazaqgeyt» attı körkem şığarma öziniñ şarıqtau şegine äli jetken joq. Ol jıl ötken sayın öz jalğasın tabuda.

“The Qazaq Times”