QR Wlttıq bank törağası Daniyar Aqışev Ükimet otırısında valyuta bağamınıñ birden qwbılıp ketuine eş negiz joq ekenin ayttı. Onıñ pikirinşe, eldegi makroekonomikalıq jağday twraqtı. 

"Biz eldigi, sauda seriktesterindegi jağday qalıptı ekenin bayqap otırmız. Tipti ayırbastau bağamdarı da twraqtı. Sondıqtan alañdaudıñ eş qajeti joq. Men osı narıqta payda tabuğa tırısıp jatqan azamattar men käsipkeler üşin tağı qaytalap aytqım keledi: biz bwğan deyin de valyuta kursı özgergen kezde birden ayırbastau punkterine barıp, ortada payda tauıp qaluğa tırısudıñ eş mäni joq ekenin birneşe märte mälimdegenbiz. Tipti wtılıp qaluıñız da mümkin. Sebebi ayırbas bağamı, makroekonomikalıq jağday jaqsı. Tipti ol nığayuı (teñge - red.) mümkin. Sondıqtan valyuta satıp alğan keybir adamdar wtılıp qaladı", - dedi Aqışev.

Onıñ sözinşe, sırtqı jağdaylar da teñgeniñ nığayuına oñ äser etip jatır. Sonday-aq ol wlttıq valyuta bağamınıñ qwnı inflyaciya körsetkişine de ıqpal etetinin mälimdedi. Sebebi qarjı retteuşiniñ sözine sensek, osı jıldıñ 8 ayındağı jağday qalıptı eken.

"Bağa 8 ayda 3,9 payızğa östi. Bwl ötken jılğa qarağanda tömen. Ol kezde bağa ösimi 5,4 payız bolğan edi. Biz soñğı aylardağı mälimetti körip otırmız, qırküyek ayındağı körsetkiş äzirge joq. Äleumettik mañızı bar tauarlardıñ da qwnı tömendey bastağan", - dedi ol.

“The Qazaq Times”