2018 jıldan bastap kommunaldıq qızmet tarifteri josparlı türde qımbattaytın boladı. Bwl turalı QR Wlttıq ekonomika vice-ministri Serik Jwmanğarin mälimdedi. 

"Jaña jıldan bastap biz wzaq merzimdi jospar boyınşa tarifterdi kötere bastaymız. Biraq köp emes, bağanı köteru 10 payızdan aspaydı", - dedi ol energetikanı baqılau jäne investiciya jönindegi konferenciyada.

Ayta keteyik, qırküyek ayınıñ basında Prezident Nwrswltan Nazarbaev investorlardı tartu maqsatında twrğın üy-kommunaldıq şaruaşığına qatıstı zañdı jetildiru kerektigi turalı ükimetke tapsırma bergen. Ol "su jäne jılu jüyesin modernizaciyalauğa köp qarajet qajet ekenin" aytqan edi.

"Halıqaralıq qarjı instituttarı men investorlardı tartu üşin Twrğın üy kommunaldıq şaruaşılığı jönindegi zañdı jetildirip, tarifterdi qayta qarau kerek. Bwl osı saladağı twtınuşılar men tabiği monopoliya sub'ektileriniñ qızığuşılığın qalıptı etuge mümkindik beredi. Meniñ aytqım kelgeni, biz jılu men su tarifterin kötermesek, investorlar kelmeydi. Öytkeni ärbir kelgen investor "Men stanciya salayın, biraq elektr energiyasın qanşağa sata alamın?" dep swraydı. Odan qorqudıñ (tarifterdi qımbattatu - red.) qajeti joq", - degen edi Prezident.

Osıdan soñ Wlttıq ekonomika ministrligi Qazaqstandağı twrğın üy kommunaldıq  tarifteriniñ nelikten ösetinin resmi türde däleldedi. Sebebi kommunaldıq qızmettegi negizgi qwraldarınıñ köpşiligi 65%-ğa tozıp ketken eken. Vedomstvo osı sebepti "injenerlik jelilerdi jañartıp, qayta qwrıp, jañğırtu qajet" dep mälimdedi. Osılayşa 2020 jılğa deyin tarifterdi köteru arqılı kommunaldıq qwrılğılardıñ tozu körsetkişin 50%-ğa deyin tömendetpek.

Qazaqstan energetika salasın damıtu maqsatında EXPO-2017 körmesin ötkizdi. Al körme bite sala tarifterdi köteru turalı şeşim qabıldau aqılğa qonbaydı. Bizde kerisinşe, körme arqılı energetika salaları damıp, kommunaldıq tarifter tömendeu kerek edi. Alayda Ükimet mwnı eskerip otırğan joq siyaqtı. Eger tarifter qımbattar bolsa, bwl qarapayım halıqtıñ qaltasına oñay timeytini anıq.

“The Qazaq Times”